2019 թվականին Հայաստանում գրանցվել է ծննդկանի մահացության 12 դեպք։ Այս ցուցանիշը նախորդ 2 տարիների համեմատությամբ աճել է։ Պարզելու համար, թե ինչ խնդիրներ կարող են առաջանալ ծննդաբերության ժամանակ, որի պատճառով հնարավոր է մահանա մայրը կամ երեխան, զրուցեցինք մանկաբարձ-գինեկոլոգ Շուշան Բադալյանի հետ։
Բժշկուհին նշեց, որ մինչև ծննդաբերության հասնելը պետք է կինը պատկերացում ունենա իր օրգանիզմի մասին և պիտի հասկանա, որ մարդն ինքնին բարդ համակարգ է և այդ բոլոր համակարգերը աշխատում են իրար հետ փոխկապակցված․
«Բժիշկների մեջ մի այսպիսի թեզիս կա՝ տղամարդիկ, կանայք և հղիներ։ Հղիները լրիվ առանձին աշխարհ են։ Մեր ազգի մեջ դեռևս չի ինտեգրվել այն մտածողությունը, որ պետք է 6 ամիսը մեկ կանոնավոր գնալ ստուգվելու և շատ հաճախ խնդիրները լինում են մինչև հղիությունը, ինչը ծննդաբերության ժամանակ բարդությունների պատճառ է դառնում»:
Շուշան Բադալյանը, հատկապես շեշտեց այն փաստը, որ եթե սովորական մարդու դեպքում բժիշկը կարող է բուժում նշանակել, ապա հղիների դեպքում նրանք գործ ունեն 2 հոգու հետ և պետք է առավելագույնս զգույշ լինել․ «Ենթադրենք ունենք ճնշման բարձրացման խնդիր և սովորական մարդու դեպքում համապատասխան մասնագետը կարող է դեղեր նշանակել և խնդիրը հարթել, բայց հղիների դեպքում բժշկի հնարավորությունները սահմանափակվում են։ Այն դեղը, որը կարող է օգնել սովորական մարդու դեպքում, հղի կնոջ դեպքում մենք չենք կարող այս մեթոդը կիրառել»:
Կարդացեք նաև
Մանկաբարձ-գինեկոլոգը նշեց, թե ինչ խնդիրներ կարող են առաջանալ ծննդաբերության ժամանակ, որի պատճառով ծննդկանը կամ երեխան մահանան․ «Մահացության պատճառ կարող է դառնալ արյունահոսությունը, քանի որ արգանդը համարվում է ամենաարյունալեցվող օրգանը և հաճախ սեփական անոթների տեղակայման պատճառով ծննդկանը նորմայից շատ արյուն է կորցնում։ Կարող է լինել թրոմբոէմբոլիան։ Այս պարագաներում բժիշկը չի կարող կռահել, որ հնարավոր է նման խնդիրներ առաջանան և եթե մենք կարող ենք սովորական պարագաներում ինչ-որ միջամտություններ անել, ապա հղի կնոջ դեպքում դա հնարավոր չէ»:
Բժշկուհին խոսեց նաև այն մասին, որ շատ կարևոր է, որպեսզի հիվանդը բժշկին վստահի․ «Երբ հղի կինը և բժիշկը հայտնվում են վիրահատարանում, այդ ժամանակ ծննդկանի մասին ամենաշատը բժիշկն է մտածում, քանի որ բժիշկը երբեք չի ցանկանա, որ իր հիվանդի գլխից մի մազ անգամ պակասի և ամեն հնարավոր բան անում է ամեն ինչ բարեհաջող ավարտելու համար»:
Հիշեցնենք նաև, որ այս տարի մահացության դեպքերից 3-ի առիթով հարուցվել է քրեական գործ և ծննդկանի հարազատները մահվան համար մեղադրում են բժշկին։
Գառնի Մութաֆյան
