«Երևան իմ սեր» հիմնադրամի բակում Լուսէ մանկական վերականգնողական կենտրոնի հաշմանդամություն ունեցող երեխաների հետ տոնածառ զարդարող ՀՀ նախագահի տիկին Նունե Սարգսյանից Aravot.am-ը հետաքրքրվեց՝ իրենց Ամանորյա սեղանի պարտադիր ուտեստները որո՞նք են լինում:
«Հայկական ավանդույթների համաձայն սեղանին պետք է հայկական ուտեսներով լինեն, որոնցից շատերը ես տատիկիցս եմ սովորել՝ սկսած հալվայից, արիշտայից, նաեւ պասուց տոլմա եմ պատրաստում, ընդհանրապես սիրում եմ պատրաստել: Իմիջիայլոց, ամեն օր պատրաստելը իմաստ չունի: Երբեմն, ճաշ եմ պատրաստում, ինձ զանգում ասում են՝ մեզ դրսում ենք ուտում, եւ ամբողջ աշխատանքն իզուր է անցնում»,-ասաց ՀՀ նախագահի տիկինը:
Նրա խոսքերով, Ամանորին եւ Սուրբ Ծննդին, անպայման, ինքն է պատրաստում. «Տոնական փլավի տակ, անպայման, լավաշ եմ դնում, ինչը բոլորի սիրելին է, հետո մենք «վիճում» են, թե ով պետք է վերցնի լավաշի կարմրած մասը»:
Կարդացեք նաև
Հարցրինք՝ տեղյա՞կ է, թե ինչ են խնդրել թոռնիկները Ձմեռ պապիկից:
«Այո, տեղյակ եմ, ցուցակներն ինձ մոտ են: Միշտ ինձ մոտ նման ցուցակներ են գալիս՝ գրքեր, խաղալիքներ, տատիկի տանը գիշեր անցկացնել: Դա էլ կարեւոր է իրենց համար: Սիրում են ինձ հետ քնել, միասին արթնանալ ու ճաշենք»,-ասաց Նունե Սարգսյանը:
Իր նոր՝ «Կախարդական կոճակները» գրքի մասին էլ խոսեց: Ասաց, որ այն թեեւ Ամանորի հետ կապ չունի, բայց վստահ է, որ երեխաները կհավանեն: Նաեւ տեղեկացրեց, որ ներկայումս պարուսույցի հետ է աշխատում, որ այդ պատմության հիման վրա մանկական բալետ բեմադրվի:
Գոհար ՀԱԿՈԲՅԱՆ
