«Թուրքիան դիմում է արդարության ժխտման հերթական քայլին՝ խորացնելով իր եւ համամարդկային արժեքների միջեւ անջրպետը: Թուրքիան հայ ժողովրդի համար հանդիսանում է անվտանգության սպառնալիք»,-լրագրողների հետ զրույցում այսօր անդրադառնալով ԱՄՆ սենատի կողմից Հայոց ցեղասպանության բանաձեւի ընդունման վերաբերյալ Թուրքիայի արձագանքին, որում վերջինս կրկին ցեղասպանության ժխտման եւ քաղաքական շահարկումների մասին է ակնարկել, ասաց ՀՀ ԱԳՆ մամուլի խոսնակ Աննա Նաղդալյանը:
Խոսելով բանաձեւի մասին՝ Աննա Նաղդալյանը շեշտեց, որ այն իրապես վճռորոշ քայլ է՝ ճշմարտության հաստատման եւ Հայոց ցեղասպանության միջազգային ճանաչման ուղղությամբ. «Այն նաեւ էական նշանակություն ունի ցեղասպանությունների կանխարգելման օրակարգում: Ցեղասպանական գործողությունները, սակայն, չեն մնացել պատմության էջերում, ցեղասպանության զոհերի սերունդներն այսօր էլ բախվում են ինքնության հողի վրա իրականացվող բռնություններին»:
Լուիզա ՍՈՒՔԻԱՍՅԱՆ
