Հայաստանում հեղափոխություն չի եղել, հեղափոխությունից հետո փոխվում են սոցիալ-տնտեսական կարգը եւ քաղաքական իշխանության բնույթը, մինչդեռ նման բաներ Հայաստանում տեղի չեն ունեցել: Սա ռուսաստանցի քաղաքագետ Անդրանիկ Միհրանյանի կարծիքն է, որը նա բարձրաձայնեց այսօր Երեւանում ընթացող ռուս-հայկական «Լազարյան ակումբի» երրորդ նիստում:
Անդրանիկ Միհրանյանի գնահատմամբ՝ նախկինում Հայաստանում «կառավարելի դեմոկրատիայի ռեժիմ» էր՝ փափուկ ավտորիտար ռեժիմ, այժմ հաստատվել է «անձնական իշխանության» ռեժիմ. «Դա այն իրավիճակն է, երբ չեն աշխատում ինստիտուտները, այլ աշխատում է մի մարդ։ Առայժմ նախադրյալներ չեմ տեսնում, որ իրավիճակը կփոխվի»:
Նրա գնահատականներով, իշխանության գալով՝ «մարգինալ ընդդիմադիր» Նիկոլ Փաշինյանը հայտարարել է Ռուսաստանի հետ հարաբերությունների կարեւորության մասին, ինչն, իր գնահատմամբ, փաստում է մի բան՝ երբ մարդը գալիս է իշխանության, կարող է պարզել իր համար պետության կառավարման ողջ պատասխանատվությունը։ Մինչդեռ Ռուսաստանում, Անդրանիկ Միհրանյանի կարծիքով, շատերը մինչեւ այժմ սպասողական վիճակում են՝ հասկանալու համար, թե ինչ է լինելու հետո։
Անդրանիկ Միհրանյանը միաժամանակ նկատեց, որ Հայաստանը ռուսաստանյան ԶԼՄ-ներում շատ թույլ է ներկայացված:
Կարդացեք նաև
Նաեւ կարեւորում է Հայաստանի ռազմավարական գործընկեր ՌԴ-ի մասին հայաստանյան հեռուստատեսային ծրագրերի գոյությունը. «Դա թույլ կտա պարզել իրավիճակը Հայաստանում, բայց այդ առաջարկները անհրաժեշտ արձագանք չեն գտել Ռուսաստանում»։
Նելլի ԳՐԻԳՈՐՅԱՆ
