«Թուրքիան անցել է այն գիծը, որն իրեն թույլատրված էր: Բացի այն, որ չէր աջակցում իր դաշնակիցներին, այդ թվում՝ Սիրիայում, այլեւ իրականացնում էր ծրագիր, որը հակասում էր ՆԱՏՕ-ի իր դաշնակիցներին եւ ԱՄՆ-ի հետ հարաբերություններին»,-լրագրողների հետ զրույցում այսօր անդրադառնալով ԱՄՆ սենատի ընդունած՝ Հայոց ցեղասպանությունը ճանաչող բանաձեւին, ասաց «Իմ քայլի» պատգամավոր, միջազգայնագետ Հովհաննես Իգիթյանը:
«ԱՄՆ-ն էլ հասկացավ, որ Թուրքիային ամեն ինչ ներելու եւ այսօրվա ագրեսիվ գործողությունների վրա աչք փակելու քաղաքականությունը հակառակ ազդեցությունն է ունենում, եւ Էրդողանն ավելի ագրեսիվ եւ ոչ բարենպաստ է դառնում տարածաշրջանի համար: Սիրիա վերջին ներխուժումը նկատի ունեմ»,-նշեց Հովհաննես Իգիթյանը:
Նրա բնորոշմամբ՝ երկար ժամանակ ասվում էր, որ Հայոց ցեղասպանության ընդունումն ԱՄՆ-ի կողմից կախված է ԱՄՆ-Թուրքիա հարաբերություններից. «Դա եւ այդպես է, եւ ոչ: Այդպես է, որովհետեւ եղել է նման իրավիճակ, եւ այդպես չէ, որովհետեւ այն երկրները, որոնք երկար ժամանակ Թուրքիային համարում էին դաշնակից, այսօր հասկացել են, որ Թուրքիայի քաղաքականությունը հակառակ ազդեցությունն է ունենում»:
Լուիզա ՍՈՒՔԻԱՍՅԱՆ
