Շիրակի մարզի ընդհանուր իրավասության դատարանը, բավարարելով նախաքննական մարմին միջնորդությունը, գիշերը գյումրեցի գործարար «Շեկոյին»՝ Գարիկ Ուզունյանին կալանավորելու որոշում է կայացրել:
Հիշեցնենք, որ Ազգային ժողովի պատգամավոր Կարեն Սարուխանյանը դիմել էր ոստիկանություն՝ հայտարարելով, որ Անի թաղամասում գտնվող «Ջավախք» խանութի դիմաց «Շեկոն» ծեծել է իր ընկերոջը, սպառնալիքներ հնչեցրել նաև իր հասցեին, իսկ պատճառը եղել է պատգամավորի քննադատությունը ՀՀ երկրորդ նախագահ Ռոբերտ Քոչարյանի՝ երկրաշարժի զոհերի հուշարձանին ծաղկեպսակ ուղարկելու մասին։
Գործարարը մեղադրվում է ՀՀ Քրեական օրենսգրքի 258 հոդվածի 3-րդ մասի 1-ին կետի հատկանիշներով, այն է՝ խմբի կազմում բռնությամբ զուգորդված խուլիգանություն կատարելը։
Այս պահին դատարանը քննում է դեպքի երկրորդ մասնակցի՝ Շեկոյի ընկերոջ՝ Զոհրաբ Մուրադի Եսիմսեյտովի խափանման միջոցի հարցը։
Կարդացեք նաև
Շիրակի դատախազ Կարեն Գաբրիելյանի փոխանցմամբ, Կարեն Սարուխանյանի ընկերը ու նրա մտերմուհին ճանաչվել են տուժողներ, տարածքում եղել են տեսախցիկներ, որոնք առգրավված են։
Նշենք նաև, որ Շեկոյի ընկերներից մեկի՝ Կարապետ Պողոսյանի պնդմամբ էլ, պատգամավորի ընկերը նաև «Շեկոյի» հետ է գտնվել մտերմիկ հարաբերությունների մեջ, վաղեմի ծանոթներ են, և միջադեպը կենցաղային հողի վրա է, բնավ կապ չունեցող Կարեն Սարուխանյանի՝ Ռոբերտ Քոչարյանին ուղղված քննադատության հետ։ Ըստ Կարապետ Պողոսյանի, Կարեն Սարուխանյանը «շառով է տալիս»:
Նունե ԱՐԵՎՇԱՏՅԱՆ
