Այսօր ԱԺ նիստի մեկնարկին պատգամավորները հոտնկայս ծափահարություններ տեղացին՝ որպես շնորհակալություն ԱՄՆ Սենատին՝ Հայոց ցեղասպանությունը ճանաչող բանաձեւի ընդունման համար:
Մինչ այդ ԱԺ նախագահ Արարատ Միրզոյանը հայտարարությամբ հանդես եկավ՝ շնորհակալություն հայտնելով հատկապես սենատորներ Մենենդեսին եւ Քրուզին «Երեկ ԱՄՆ Սենատում տեղի ունեցած պատմական քվեարկությամբ ԱՄՆ-ն ճանաչեց եւ դատապարտեց 20_րդ դարի ամենասոսկալի իրադարձություններից մեկի, ողջ մարդկության դեմ ուղղված հանցագործության, իրենց հայրենիքում 1,5 մլն հայերի բնաջնջումն Օսմանյան կայսրության կողմից: Ես 3 խմբակցությունների անունից ցանկանում եմ ողջունել ԱՄՆ Սենատի, ինչպես նաեւ դրանից առաջ Կոնգրեսի ներկայացուցիչների պալատի բոլոր գործընկերներին, համապատասխանաբար թիվ 150 եւ 296 բանաձեւերի միաձայն ընդունման կապակցությամբ: Այս քվեարկությամբ ԱՄՆ-ն միացավ ցեղասպանությունների կանխարգելմանն ուղղված համաշխարհային շարժմանը: Այս առիթով ուզում եմ շնորհակալություն հայտնել հատկապես սենատորներ Մենենդեսին եւ Քրուզին, ինչպես նաեւ դրանից առաջ կոնգրեսական Շիֆին եւ հայազգի բոլոր բարեկամներին՝ այս երկու նախագծերի պաշտպանության համար»:
Միրզոյանն առանձին երախտիքի խոսքեր հղեց նաեւ Հայ դատի գրասենյակի եւ ԱՄՆ-ում հայկական ասամբլեայի բոլոր ընկերներին, ովքեր տարիներ շարունակ ջանք չեն խնայել՝ այս կարեւոր արձանագրմանը հասնելու համար:
Կարդացեք նաև
Հռիփսիմե ՋԵԲԵՋՅԱՆ
