Ամերիկյան Тime ամսագիրը 2019թ. տարվա մարդ է ճանաչել Շվեդիայից 16-ամյա էկոակտիվիստ Գրետա Թունբերգին:
«Թունբերգը ինչ-որ կուսակցության կամ փաստաբանական խմբի առաջնորդ չէ: Նա առաջինը չէ, որ ահազանգում է կլիմայական ճգնաժամի առիթով, և ոչ էլ ամենաորակավորվածն է՝ այդ հարցը լուծելու համար: Նա գիտնական չէ, ոչ էլ քաղաքական գործիչ: Նա ազդեցության ավանդական լծակների չի տիրապետում: Նա միլիարդատեր չէ, արքայադուստր չէ, ոչ էլ փոփ-աստղ, անգամ չափահաս չէ: Նա սովորական դեռահաս է, որ համարձակություն է ունեցել ասել ճշմարտությունը և դառնալ սերնդի կուռքը: Խորաթափանց զայրույթով խոսելով վերացական վտանգի մասին՝ Թունբերգը դարձավ մոլորակի առջև ծառացած ամենակարևոր խնդրի մասին պատմող ամենահամոզիչ ձայնը»,- նրա մասին գրում է պարբերականը խմբագրականում:
Գրետա Թունբերգը հայտնի դարձավ 2018թ. Ստոկհոլմի խորհրդարանի դիմաց հացադուլ-ակցիայի շնորհիվ. նա հայտարարել էր, որ ուրբաթ օրերին դպրոց չի գնա, քանի դեռ իշխանությունները չեն սկսել հետևել կլիմայի համաձայնագրին: Դրա համար նա առաջադրվել էր Խաղաղության նոբելյան մրցանակի:
Իսկ 2019թ. սեպտեմբերին Թունբերգը եկավ Նյու Յորք, որտեղ աղմկահարույց ելույթով հանդես եկավ ՄԱԿ-ի կլիմայի վերաբերյալ գագաթնաժողովում:
Կարդացեք նաև
2019թ. Time-ի «Տարվա մարդ» մրցանակի կարճ ցուցակում էին հայտնվել ԱՄՆ Կոնգրեսի Ներկայացուցիչների պալատի խոսնակ Նենսի Փելոսին, ԱՄՆ նախագահ Դոնալդ Թրամփը, Չինաստանի նախագահ Սի Ցզինպինը, Facebook-ի հիմնադիր Մարկ Ցուկերբերգը և այլք:
Պատրաստեց՝ Վիկտորյա ԱՆԴՐԵԱՍՅԱՆԸ
