Այսօր Գյումրու քաղաքապետարանի դահլիճում տեղի ունեցավ հանրային բաց լսում 2020 թվականի բյուջեն հաստատելու ավագանու որոշման նախագծի վերաբերյալ։
Քաղաքի գլխավոր ֆինանսիստ Լենա Ջիլավյանը 2020 թվականի բյուջեն համարեց խիստ իրատեսական, հավաստի, հստակ և հավասարակշռված, քանի որ եկամուտներն ու ծախսերը հիմնավոր են։ Նա ներկայացրեց բյուջեի կանխատեսվող տարբերակը, 2020 թվականի սկզբին ավագանուն կներկայացվի արդեն ճշտված տարբերակը։
«2020 թվականի համար համայնքի բյուջեի եկամուտները կազմում են 3 միլիարդ 992,6 միլիոն դրամ, ծախսերը հավասար են եկամուտներին՝ 3 միլիարդ 992,6 միլիոն դրամ։ Պետության կողմից համաֆինանսավորում, այսինքն՝ դոտացիա նախատեսվել է տարվա ընթացքում հատկացնել 2 միլիարդ 281,8 միլիոն դրամ։
Մենք ունենք նաև այլ պաշտոնական տրանսֆերտներ՝ 360 հազար դրամ, սա մեր այլընտրանքային ծառայողների համար նախատեսված գումարն է, մենք ունենք պետության կողմից պատվիրակված լիազորությունների իրականացման դիմաց հատկացվող գումար, որը միշտ հատկացվում է՝ 77 միլիոն 990 հազար դրամ», -զեկուցեց գլխավոր ֆինանսիստը։
Կարդացեք նաև
Սեփական եկամուտներ աճը 2020 թվականին նախորդ տարվա հետ համեմատ կկազմի 7,6 տոկոս։
«Գալա» խմբակցության ավագանու անդամ Արմենուհի Վարդանյանը Լենա Ջիլավյանից հետաքրքրվեց, թե պարգևավճարների աղմուկի ֆոնին Գյումրու քաղաքապետարանում նախատեսվե՞լ են պարգևավճարներ։
«Շատ կուզենայի լինեին պարգևավճարներ, որովհետև մեր աշխատավարձերն այնքան ցածր են այդ տանջանքի հետ համեմատ, որ հնարավոր չէ պատկերացնել։ էլի մինիմումով բարձրացած կկազմի 68 հազար դրամ, բայց մենք այդքան գումար չունենք, որ նախատեսենք պարգևավճար, եթե հանկարծ-հանկարծ ստացվի այնպես, որ մնացորդ ունենանք աշխատավարձի ֆոնդի և կարողանանք ամանորյա պարգևավճարներ տալ, դա կկազմի ընդամենը յուրաքանչյուրի աշխատավարձի ամենաշատը 30 տոկոսը, եթե հանկարծ ստացվի»,-ասաց գլխավոր քաղաքի ֆինանսիստը։
Նունե ԱՐԵՎՇԱՏՅԱՆ
