Aravot.am-ն այսօր Տուլայի մարզի գործարար Սերգեյ Կոկարեւից, որն իր մյուս գործընկերների հետ պատրաստվում է Հայաստանում ներդրումներ անել, հետաքրքրվեց՝ ինչպիսի՞ խնդիրներ են նկատել Հայաստանի ներդրումային դաշտն ուսումնասիրելիս: «Բիզնեսը միշտ ռիսկեր է պարունակում, հատկապես՝ ֆինանսական: Մեզ պետք են երաշխիքներ, որ մտնելով Հայկական շուկա, մեկ կամ կես տարի անց, նախագիծն իրացնելուց հետո քաղաքական իրավիճակի փոփոխություն չի լինի եւ մեր բիզնեսը չի կանգնի դժվարությունների առաջ»:
Հարցրինք՝ հայկական կողմը տվե՞լ է այդ երաշխիքները, որ, այնուամենայնիվ, որոշել են ներդրումներ անել, պարոն Սերգեյ Կոկարեւը պատասխանեց, որ ներկայումս ակտիվ համագործակցություն է ընթանում ԵԱՏՄ շրջանակներում եւ բոլոր այդ երաշխիքները այնտեղ ամրագրված են:
Այսօր Տուլայի մարզի մի քանի գործարարներ հայաստանյան կազմակերպությունների հետ համագործակցության փաստաթղթեր ստորագրեցին՝ երկկողմ տուրիզմ զարգացնելու, Հայաստանում աղբի վերամշակման գործարան հիմնելու եւ այն:
Միջոցառմանը ներկա տուրիզմի հայկական ֆեդերացիայի նախագահ Մեխակ Ապրեսյանի խոսքով, մեր երկիր այցելած զբոսաշրջիկների 40 տոկոսից ավելին Ռուսաստանից են. «Հայաստանը գնալով ավելի գրավիչ է դառնում ներդրումների, զբոսաշրջության առումով: Նպատակ կա Հայաստանն իր տարածքներով, Ռուսաստանն իր տարածքներով, մասնավորապես՝ Տուլայի շրջանով, համատեղ միջտարածաշրջանային զբոսաշրջային արդյունք ձեւավորել եւ համաշխարհային շուկայում ավելի հետաքրքիր ու մրցունակ պրոդուկտներով ներկայանալ»:
Թե ինչ խնդիրներ կան զբոսաշրջության ոլորտում, որը խոչընդոտում է, որպեսզի ոլորտը զարգանա Aravot.am-ի հարցին, Մեխակ Ապրեսյանը պատասխանեց. «Պետք է հստակ կարգավորել դաշտը որոշ գործունեության տեսակների նկատմամբ, օրենքով հստակ չափանիշներ սահմանել: Պետք է լիցենզավորել կամ, առնվազն, ծանուցման ենթակա գործունեության տեսակ սահմանել զբոսաշրջային օպերատորի, գործակալի գործունեությունը, հյուրանոցային ծառայությունները օպերատորի, զբոսավարի եւ ուղեկցորդի գործունեությունը: Այս պահին այդ գործունեության տեսակներն ազատ են եւ, եթե, օր առաջ մենք այդ խնդիրները չկարգավորենք, վտանգում ենք գործարար միջավայրը, մրցակցային միջավայրը եւ Հայաստանի իմիջը»:
Կարդացեք նաև
Լուսինե ԲՈՒԴԱՂՅԱՆ
