Երկրորդ նախագահ Ռոբերտ Քոչարյանը «Հրապարակ» օրաթերթին տված հարցազրույցում ասել էր. «1998 թվականին բնակչության զգալի մասը պահանջում էր նստեցնել Տեր-Պետրոսյանին եւ ընդհանրապես՝ ՀՀՇ ամբողջ վերնախավին: Ես այն ժամանակ համարեցի, որ պետք է ապագա կառուցել, այլ ոչ թե պայքարել անցյալի դեմ: Ցանկացած նախագահ ունի քաղաքական հակառակորդներ, որոնք կարող են իրենց կողմնակիցներին ապակառուցողական էմոցիաներ հաղորդել: Սակայն այդպիսի էմոցիաներն արդյունքում շրջվում են հենց այդ տրամադրությունները ստեղծողների դեմ»:
Այսօր ԱԺ պաշտպանության եւ անվտանգության հարցերի հանձնաժողովի նախագահ, «Իմ քայլի» պատգամավոր Անդրանիկ Քոչարյանը Aravot.am-ի հետ զրույցում արձագանքելով այս խոսքերին՝ ասաց. «Այդ պահանջի մասին երեւի մենակ ինքը գիտի: Այդպիսի բան չի եղել: Բնակչության հետ երկխոսության մեջ ինքը երբեք չի եղել: Բնակչության հետ Ռոբերտ Քոչարյանը երբեք երկխոսություն չի ունեցել»:
Ճշտեցինք, այսինքն, նման պահանջ Քոչարյանի առջեւ չե՞ն դրել ու նա իրականում անցյալի դեմ պայքարե՞լ է, թե՞ չի պայքարել՝ Անդրանիկ Քոչարյանը պատասխանեց. «Ռոբերտ Քոչարյանը նույնիսկ ընտրությունների ժամանակ բնակչության հետ երկխոսություն չի ունեցել»:
Հռիփսիմե ՋԵԲԵՋՅԱՆ
