«Թող ձեռք մեկնեն իրենց հաշվին, ոչ թե ՀՀ հարկատուների: Հասկանում ենք, որ ժողովուրդն է իշխանությանն ընտրել, բայց ոչ նրա համար, որ իրենց գրպանի հաշվին թոշակի ուղարկեն նախկին իշխանությունից մնացած անձանց»,-լրագրողների հետ ճեպազրույցում այսօր անդրադառնալով ՍԴ դատավորների համար կամավոր վաղ կենսաթոշակ սահմանող օրինագծին, որն այսօր խորհրդարանն ամբողջությամբ ընդունեց, հայտարարեց ԼՀԿ պատգամավոր Տարոն Սիմոնյանը:
Հիշեցնենք՝ Արդարադատության նախարարության հեղինակած այս օրինագծի վերաբերյալ «Իմ քայլը» հայտարարել է, որ այն հաշտության ձեռք է՝ ուղղված ՍԴ դատավորներին:
«Սա չի կարող համարվել մեկնված ձեռք՝ ՀՀ քաղաքացիներից: Սա քաղաքական իշխանության ձեռքն է, եւ թող բարի լինեն իրենց գրպանից փոխհատուցել այդ կենսաթոշակը»,-համոզմունք հայտնեց Տարոն Սիմոնյանը:
Կարդացեք նաև
Նա կարծում է, որ ՍԴ դատավորները բարձր պրոֆեսիոնալիզմ ունեն. «Երբ նրանց նման առաջարկ են ներկայացնում, այդ թվում նրանց, ովքեր մի քանի տարի են աշխատել, ստացվում է, որ դատավորները վաճառում են իրենց մասնագիտական բարոյականությունը՝ փողի դիմաց: Հուսամ՝ որեւէ դատավոր այս մեկնած ձեռքը չի սեղմի»:
ԼՀԿ մեկ այլ պատգամավոր Գեւորգ Գորգիսյանն էլ լրագրողներին դիմելով ասաց. «Ինչպե՞ս կվարվեինք, եթե կառավարությունը Ձեզ գումար տար՝ ձեր պարտականությունները չիրականացնելու համար»:
Լուիզա ՍՈՒՔԻԱՍՅԱՆ
