«Հեռու եմ այն մտքից, որ այս կարգավորումը լուծելու է ՍԴ-ի ճգնաժամը, բայց միանում եմ «Իմ քայլի» գործընկերների ջանքերին եւ «կողմ» եմ քվեարկելու»,-ԱԺ նիստում այսօր ՍԴ դատավորների համար կամավոր վաղ կենսաթոշակ սահմանող օրինագծի՝ առաջին ընթերցմամբ քվեարկությունից առաջ հայտարարեց պատգամավոր Արման Բաբաջանյանը:
ԼՀԿ պատգամավոր Գեւորգ Գորգիսյանն էլ ԱԺ նախագահ Արարատ Միրզոյանին մեղադրեց նրանում, որ վերջինս չի ցանկանում բազմակարծություն տեսնել. «Դեմ ենք քվեարկելու»:
Հիշեցնենք, որ ԼՀԿ-ն քննադատում է այս օրինագիծը, ԲՀԿ-ն՝ եւս: «Իմ քայլը» խմբակցության ղեկավար Լիլիթ Մակունցն էլ հակադարձեց Գորգիսյանին՝ ասելով, որ ողջունում են բազմակարծությունը. «Մեր նպատակն է՝ կատարել խորքային բարեփոխումներ, եւ այս օրինագիծը նպաստելու է դրան»:
ԼՀԿ պատգամավոր Անի Սամսոնյանն էլ նշեց. «Այս ամբիոնից ձեր գիտելիքներով ջարդուփշուր արեցիք ՍԴ-ն, բայց այդպես էլ մեզ չբացատրեցիք՝ եթե ՍԴ դատավորներն այդքան վատն են, ինչո՞ւ եք պատվով ճանապարհում բարձր թոշակի: Չհամոզեցիք»:
Կարդացեք նաև
Ի վերջո, «կողմ» քվեարկեց 65(+18 պատգամավորի՝ նամակով «կողմ» քվեարկությունները), իսկ «դեմ» 33՝ պատգամավոր:
Հավելենք, որ օրինագիծը դեռ պետք է քվեարկվի երկրորդ ընթերցմամբ:
Լուիզա ՍՈՒՔԻԱՍՅԱՆ
