«Ըստ իմ ունեցած տեղեկությունների՝ այս կամ այն ճնշման գործիքն է օգտագործվում ՍԴ-ի դատավորների նկատմամբ»,- «Հայելի» ակումբում լրագրողների հետ հանդիպմանը, անդրադառնալով ՍԴ դատավորներին կամավոր վաղ կենսաթոշակի «ուղարկող» օրինագծին ասաց «Ադեկվադ» նախաձեռնության անդամ Կոնստանտին Տեր-Նակալյանը:
Նա մանրամասնեց, որ Հրայր Թովմասյանից ձերբազատվելու համար պետք է ՍԴ դատավորներից չորս հոգի. «Մեկի նկատմամբ կա շանտաժ, քրեական գործ, մյուսի նկատմամբ այլ մեղադրանք, երրորդին շատ գումարով են ուզում գայթակղել, ինչը նոնսենս է»:
Ըստ Կոնստանտին Տեր-Նակալյանի՝ այս իշխանության տարբերանշանը դարձել է այն, որ եթե նախորդները ստվերային պայմանավորվածություններ հասնելու համար օգտագործում էին ստվերային կապիտալ, ապա այս իշխանությունները պետական բյուջեն տնօրինում են որպես իրենց հոր դյուքանը:
ՀՀԿ-ական Կարինե Աճեմյանի գնահատմամբ՝ իշխանությունն արագ կտրվում է իրականությունից. «Իրենց շատ լավ են զգում այս կարգավիճակով: Այս ամոթալի օրինագիծն ամենախայտառակն է ՀՀ անկախ հանրապետության ժամանակահատվածում: Այստեղ շատ հակասություններ կան, այն օրինականացնում է կաշառքի ինստիտուտը, քանի որ մարդուն կաշառում են, որ իրենից ազատվեն: Կարծում եմ՝ որևէ խելամիտ, նորմալ հետագիծ ունեցող, իր մասնագիտությունը հարգող դատավոր դա երբեք չի անի: Այս իշխանությունները հավերժ չեն, և այն դատավորները, որոնք կգնան այդ քայլին, անպայման հաջորդ իշխանության օրոք կենթարկվեն պատասխանատվության»:
Կարդացեք նաև
Տաթև ՀԱՐՈՒԹՅՈՒՆՅԱՆ
