«Այո, տիկին Զոհրաբյան, դպրոցներն այդ վիճակում են, իսկ ինչո՞ւ, որովհետեւ նաեւ դուք այստեղ նստած՝ ՀՀԿ-ի հետ կնոպկա եք սեղմել»,-ԱԺ ամբիոնից այսօր անդրադառնալով ԲՀԿ պատգամավոր Նաիրա Զոհրաբյանի այսօրվա հայտարարությանը՝ ասաց ԱԺ փոխնախագահ Ալեն Սիմոնյանը: «Այդ դրա պատճառով էլ է այդ վիճակը: Մենք կնորոգենք դպրոցները, ինչպես նորոգեցինք ճանապարհները, ինչպես բանակի սպասարկման հարցն ենք լուծում…որեւէ մեկը թող այդ մասին չանհանգստանա»,-վստահեցրեց Ալեն Սիմոնյանը, ապա անդրադարձավ ՍԴ դատավորների համար կամավոր վաղ կենսաթոշակ սահմանող օրինագծին, որը քննադատում են ԲՀԿ-ն եւ ԼՀԿ-ն:
«Ունենք խնդիր: Զարմանում եմ, երբ Գեւորգ Գորգիսյանն ասում է, թե սա կեղծ օրակարգ է: Դա այս տրամաբանությունից է՝ «Սերժը մեղավոր չի, կողքիններն են մեղավոր»…Այդ ինչպե՞ս է ստացվում, որ ՍԴ-ն ոչ մի կապ չունի կեղծված ընտրություններին գնահատական տալու հետ եւ ՍԴ որոշումների հետ, որոնք տանում ես սուրճի բաժակ նայողի մոտ՝ հասկանալու, թե ինչ են գրել: Ով ոնց ուզում, այդպես էլ մեկնաբանում է»,-նշեց Ալեն Սիմոնյանը, ապա անդրադարձավ ԲՀԿ պատգամավոր Իվետա Տոնոյանի այն նկատառմանը, որ ՍԴ դատավորներից որեւէ մեկը ԲՀԿ-ի աչքի լույսը չէ,-«իսկ ինչո՞ւ: Բա դրա բացատրությունն ինչո՞ւ չեք տալիս, ինչո՞ւ չեք խոսում, հարմար չի հա՞ հիմա դրա մասին խոսելը: Բա խոսացեք, տիկին Տոնոյան, հա՜, հարմար չէր…»:
Ալեն Սիմոնյանը համաձայն չէ Իվետա Տոնոյանի նաեւ այն գնահատականի հետ, թե որեւէ դատավոր վստահություն չի վայելում. «Ո՞վ է ասում: Դուք հասկանո՞ւմ եք՝ ինչ եք ասում: Ինչպե՞ս կարելի է ողջ դատական համայնքին նման գնահատական տալ: Ի՞նչ իրավունք ունեք բոլորին գնահատական տալ: Հերիք է այս ամբիոնից խոսել գեղեցիկ բառեր օգտագործելու եւ խոսափող ծռելու, «յութուբում» հայտնվելու համար: Ժողովուրդն ամեն ինչ զգում է, տեսնում, երբ դիմացինն իրեն խաբում է: Մի արեք»:
Կարդացեք նաև
Լուիզա ՍՈՒՔԻԱՍՅԱՆ
