«Իմ քայլը» խմբակցության ղեկավար Լիլիթ Մակունցին այսօր հարցրեցինք՝ Էդմոն Մարուքյանն ասում է, որ անձամբ իր կյանքում այս մեկ տարվա ընթացքում շատ բան չի փոխվել, ոնց 460 հազար դրամ ստանում էր, այդպես էլ հիմա է ստանում, կոնկրետ ձեր կյանքում ֆինանսական թե այլ առումով շա՞տ բան է փոխվել այս մեկ տարում՝ Մակունցը պատասխանեց. «Ֆինանսական առումով ծախսերս շատացել են, այնպես որ, իմ առումով որեւէ բան չի փոխվել էլի, բայց ես չեմ կարծում, որ պետք է տրտնջանք: Մենք այստեղ ենք հենց դրա համար, որպեսզի կարողանանք հնարավորինս մեր հմտությունները, գիտելիքները եւ այն մանդատը, որ տրվել է մեզ, հնարավորինս ծառայեցնենք հանրօգուտ: Սա է մեր առաքելությունը, որեւէ մեկս չենք տրտնջում, այդ թվում, վստահ եմ, Էդմոն Մարուքյանը եւս»: Իսկ թե Մակունցի ի՞նչ ծախսերն են ավելացել՝ նա պատասխանեց. «Ներկայացուցչական ծախսերը»:
Հարցին՝ որպես օրենսդիր մարմնի ներկայացուցիչ, չե՞ք նեղվում, որ նախարարը 1,5 մլն աշխատավարձ է ստանում, իսկ դուք՝ 460 հազար, այն էլ՝ խորհրդարանական երկրում՝ Մակունցը պատասխանեց. «Դուք սադրում եք ինձ, ես, իհարկե, սադրանքի չեմ տրվի: Մենք խնդիր ենք դնում խորհրդարանականների դերի բարձրացման եւ եթե միջազգային պրակտիկան ուսումնասիրենք, խմբակցության ղեկավարները քաղաքական առումով այլ ներգրավվածություն ունեն, եւ մենք պատրաստվում ենք ընդդիմության հետ մի նախագիծ բերել, որը կբարձրացնի խմբակցության ղեկավարների, այդ թվում ընդդիմադիր խմբակցությունների դերը: Սա չի նշանակում, որ դրանով փորձ ենք կատարում աշխատավարձերը բարձրացնել, ոչ: Բայց խորհրդարանականների դերի բարձրացումը կարեւոր է»:
Նաեւ հարցրեցինք՝ խմբակցության ղեկավարը ստանում է նույնքան աշխատավարձ, որքան խմբակցության ցանկացած պատգամավոր, այդ թվում՝ այն պատգամավորը, որ որեւէ ելույթ չի ունեցել, որեւէ հարց չի տվել, ակտիվությամբ աչքի չի ընկել, միայն կոճակ է սեղմել, այստեղ անարդարացիություն չե՞ք տեսնում, Մակունցը պատասխանեց. «Որպես խմբակցության ղեկավար ստանում ենք այնքան, որքան բոլոր պատգամավորները, խոսքը չի վերաբերում հանձնաժողովի նախագահներին, տեղակալներին, ես չեմ տրտնջում»:
Կարդացեք նաև
Հռիփսիմե ՋԵԲԵՋՅԱՆ
