Շեյխերի պատմությունը ԲՀԿ խմբակցության ղեկավար Գագիկ Ծառուկյանը դեռ «տաք» է պահում։ Երեկ նա նշել է. «Հիմնական հարցը թողած՝ ինչի մասին են խոսում, ջինսով կգային, մեծ տղան էր, կրտսեր տղան էր։ Ամոթ է, մարդիկ եկել էին գործով, եկել էին բիզնես ծրագրով: Ով էլ հիմա դիմի, նրանք չեն գա, այդպիսի մոտեցում.. Դուք տեսա՞ք, որ ասացին, որ զգացել են՝ անցանկալի հյուրեր են»։ Թե Հայկ Մարությանը որքան կարող է այս տեմպով շարունակել աշխատել, դժվար է ասել, բայց մամուլում պարբերաբար տեղեկություն է հայտնվում, որ նա աշխատանքից ազատման դիմումներ է գրել։ Երևանի ավագանու «Լույս» խմբակցության քարտուղար ԱՆԻ ԽԱՉԱՏՐՅԱՆԻ հետ զրուցեցինք վերջին աղմկոտ թեմաներից։
-Արդեն մեկ տարուց ավելի է Երևանն ունի «հեղափոխական» քաղաքապետ։ Դուք, որպես ավագանու անդամ, ի՞նչ «հեղափոխական» փոփոխություններ եք նկատել մայրաքաղաքում։
-Ոչ մի։ Այս ընթացքում հասկացանք, որ Տարոն Մարգարյանի «մահվան վերելակներից», հուսահատության գազելներից և փոշու ամպերից ելք չկա:
-Ձեր խմբակցությունը հաճախ է տարբեր խնդիրների, խախտումների մասին բարձրաձայնում։ Վերջինը բավական բուռն քննարկվեց, խոսքը քաղաքապետարանին նվեր տված «Կամազների» մասին է։ Ըստ Ձեզ` ինչու՞ են բիզնեսով զբաղվող մարդիկ նման նվիրատվություն անում։
Կարդացեք նաև
-Ընդհանրապես, նվիրատվությունը լավ պրակտիկա է։ Տարիներ շարունակ սփյուռքից բարերարները նվիրատվություն են արել, մեր խմբակցությունը ողջունում է նվիրատվությունները, սակայն մեր բարձրացրած խնդիրը թափանցիկությանն էր վերաբերում։ Հանրությունն ունի տեղեկացված լինելու և իշխանությունների որոշումների ու գործողությունների վերաբերյալ իր համաձայնությունն ու անհամաձայնությունն արտահայտելու իրավունք։ Յուրաքանչյուր բարեգործ իր բարեգործության դիմաց ստանում է հանրության երախտագիտությունը, և դա լուրջ փոխհատուցում է: Բոլորս էլ գիտակցում ենք, որ բարեգործությունն ունի իր արժեքը, և եթե այն հանրայնացված չէ, փոխհատուցման այլ միջոցներ են ակնկալվում։ Այս նվիրատվությունների և շինթույլտվությունների փոխկապակցումը մեզ թույլ է տալիս ենթադրել, որ այստեղ խնդիրներ կան։ Լիահույս եմ, որ արդար քննությամբ դա կապացուցվի:
-Ձեր խմբակցությունն օրերս բարձրաձայնեց նաև Ամանորի միջոցառումների համար Երևանի բյուջեից մեծ գումար հատկացնելու մասին։ Ի՞նչ եք կարծում, ինչու՞ է Հայկ Մարությանն այդքան շռայլորեն ուզում կազմակերպել Ամանորը։
-Հայկ Մարությանը դա միայնակ չի անում, ծախսերի մեծ պատառը տրամադրում է կառավարությունը։ Հին Հռոմում գոյություն ուներ հայտնի մեթոդ՝ հաց ու տեսարաններ, որի նպատակն էր` շեղել ժողովրդի ուշադրությունը պետության առաջ ծանրացած իրական խնդիրներից։ Հազարամյակներ հետո էլ ոչինչ չի փոխվել։ Այդ քաղաքական մանիպուլյացիան միշտ օգտագործվել է տարբեր պետությունների իշխանությունների կողմից։ Ցավոք, այսօրվա ՀՀ կառավարությունը, կարծում եմ, նույնպես օգտագործում է այդ հնարքը։ Օբյեկտիվ և սուբյեկտիվ պատճառներով «հաց առաջարկելու» հնարավորություն չունի, բայց տեսարաններն ակտիվ և հաջող ապահովում է:
Ռուզան ԽԱՉԱՏՐՅԱՆ
Հարցազրույցն ամբողջությամբ՝ «Իրատես» թերթի այսօրվա համարում
