Պատգամավոր Արման Բաբաջանյանը կարծում է, որ նախորդ տարիներին ՍԴ որոշումներն ապահովել են նախորդ իշխանության երկարակեցությունը: «Ես ՍԴ-ին մեղսակից եմ համարում առնվազն 2003թ.-ից սկսած՝ ընտրական վեճերի որոշումներին հաջորդած քաղաքական հետապնդումներին, բռնաճնշումներին, սպանություններին, Մարտի մեկի սպանդին եւ մարտի մեկին կատարված սպանություններին: Հետեւաբար, ես դեմ եմ, որ այս հանցագործ ՍԴ անդամներին վաղաժամ կենսաթոշակի հնարավորության հարցը քննարկենք: Դուք ի՞նչ եք կարծում նրանց մեղսակցության մասին»,-ԱԺ նիստում այսօր Արդարադատության նախարար Ռուստամ Բադասյանին այսպիսի հարցադրում հղեց նա՝ ՍԴ դատավորներին կամավոր վաղ կենսաթոշակի «ուղարկող» օրինագծի քննարկման ժամանակ:
Բադասյանը նկատեց՝ հիշատակվածում մեղավորություն ունեն թե պետական կառույցները եւ թե քաղաքացիները, որոնք հանդուրժել են նման վարքագիծը. «Բայց ՍԴ անդամներին, որոնց առաջարկվում է կամավոր վաղ կենսաթոշակի դիմել, ես չեմ համարում հանցագործներ: Նման հայտարարություն անելու հիմք չունեմ: Օրինագծի իմաստն այն է, որ սա ձեռքսեղմում է պետության եւ ՍԴ այդ անդամների միջեւ: Ինչ վերաբերում է ՍԴ այն որոշումներին, որոնք կասկած են առաջացրել հանրության շրջանում, համաձայն եմ ձեր կարծիքի հետ, որ ունենք լուրջ խնդիր: Ճգնաժամն էլ դրանից է առաջացել»:
Լուիզա ՍՈՒՔԻԱՍՅԱՆ
