ՀՀ Վերաքննիչ դատարանի դատավոր Մխիթար Պապոյանը բավարարեց իրեն ներկայացված ինքնաբացարկի միջնորդությունը:
Միջնորդությունը, հիշեցնենք, ներկայացրել էր մեղադրող Գեւորգ Բաղդասարյանը:
Հիշեցնենք՝ դեկտեմբերի 6-ին, կալանքի տակ գտնվող ՀՀ երկրորդ նախագահ Ռոբերտ Քոչարյանի պաշտպանների ներկայացրած՝ ընդդեմ առաջին ատյանի դատարանի որոշման բողոքի քննության ժամանակ, դատախազ Գեւորգ Բաղդասարյանն ինքնաբացարկի միջնորդություն հայտնեց նախագահող դատավոր Մխիթար Պապոյանին: Միջնորդությանը միացել էին նաեւ տուժողները, տուժողների իրավահաջորդներն ու նրանց ներկայացուցիչները:
Կարդացեք նաև
Ինքնաբացարկի հիմքն այն էր, որ գործը քննող դատավոր Մխիթար Պապոյանը եւ առաջին ատյանի դատարանում Ռոբերտ Քոչարյանին ազատ արձակելու որոշում կայացրած դատավոր Ալեքսանդր Ազարյանն ընկերներ են եւ Ռոբերտ Քոչարյանին ազատ արձակելու որոշումն էլ, ըստ ֆեյսբուքյան օգտատերերից մեկի հրապարակման՝ միասին են գրել: ԱԱԾ-ում էլ այս առիթով քրեական գործ կա հարուցված եւ նման հրապարակումների իսկությունը դեռ պետք է պարզվի:
Մեղադրող կողմը եւ միջնորդությանը միացած կողմերը գտնում են, որ այս դատավորները Ռոբերտ Քոչարյանի նկատմամբ ունեն ուղղորդված համակրանք:
Գործը կմակագրվի այլ դատավորի:
Նելլի ԳՐԻԳՈՐՅԱՆ
