Ազգային ժողովում այսօր քննարկվում էր «Իմ քայլը» խմբակցության պատգամավորներ Արմեն Խաչատրյանի եւ Սիփան Փաշինյանի հեղինակած՝ «Օպերատիվ-հետախուզական գործունեության մասին» ՀՀ օրենքում փոփոխություններ կատարելու մասին օրենքի նախագիծը, որով առաջարկվում է ԱԱԾ-ից բացի գաղտնալսելու իրավունք տալ նաեւ Ոստիկանությանը: Նույն խմբակցության պատգամավոր Անդրանիկ Քոչարյանն օրինագծի վերաբերյալ համոզմունք հայտնեց, որ այն ճիշտ պահին է ներկայացված. «Այն լրացնում է Ոստիկանության գործիքակազմը, ինչն այսօրվա պարտիզանական գործողությունների ֆոնին շատ կարեւոր նախաձեռնություն է: Պատահական չէ, որ դեռեւս 2007թ.-ին Ոստիկանությանը զրկեցին նման հնարավորություն ունենալուց, եւ 2008թ.-ին տեղի ունեցավ Մարտի մեկը…Վերջերս շրջանառության մեջ հայտնվեցին անվտանգության ծառայության գեներալ-մայոր Տիգրան Բաղդասարյանի նախաքննական խոստովանական ցուցմունքներն առ այն, որ Մարտի մեկի գործով անվտանգության ծառայության մարմինները կեղծել են փաստաթղթեր, եւ եթե այդ ժամանակ Ոստիկանությունն ունենար նշյալ գործառույթը, համոզված եմ, որ նման կեղծիքներն անհնար կլինեին: Այսօր այս նախագծով առաջարկվում է դա»:
Ապա Անդրանիկ Քոչարյանը կոչ արեց ուսումնասիրել որոշ կառույցների՝ ապօրինի կերպով գաղտնալսման տեխնիկական հնարավորություններ ձեռքբերած լինելու փաստը եւ որպես օրինակ վկայակոչեց, որ հիշատակված տարիներին Մաքսային ծառայությունն էր նման բան արել: Նա կոչ արեց ուսումնասիրելու նաեւ այն օլիգարխներին, որոնք նման հնարավորություն էին ստեղծել իրենց թիկնազորի համար:
Լուիզա ՍՈՒՔԻԱՍՅԱՆ
