Դեկտեմբերի 5-ին Ալ. Սպենդիարյանի անվան օպերայի եւ բալետի ազգային ակադեմիական թատրոնում տեղի է ունեցել Ջուզեպե Վերդիի «Պարահանդես – Դիմակահանդես» օպերայի բեմականացումը: Օպերայի սյուժեն հիմնված է Շվեդիայի արքա Գուստավ Երրորդի սպանության պատմության վրա, սակայն գրաքննության պահանջով այն ենթարկվել է խիստ փոփոխության։ Սա Վերդիի 23-րդ օպերան է, եւ պատկանում է նրա լավագույն ստեղծագործությունների թվին, այսօր բեմադրվում է աշխարհի հեղինակավոր օպերային թատրոններում։
Հայաստանի օպերայի եւ բալետի թատրոնում Վերդիի «Պարահանդես-Դիմականադես» օպերան վերջին անգամ ներկայացվել է 60 տարի առաջ։ Օրերս կայացած բեմականացման դիրիժորը Մկրտիչ Բաբաջանյանն է, որն իր խոսքում նշեց. «Լինելով նաեւ օպերային երգիչ` գիտեմ, որ սա Վերդիի գեղեցկագույն օպերաներից մեկն է: Ճշտեցի, որ այն Երեւանում 1960թ. է ներկայացվել, եւ դրանից ոգեշնչված որոշեցինք անել այս աշխատանքը նոր լուծումներով»:
Ներկայացմանը ներգրավված են թատրոնի մեներգիչները, երգչախումբը, սիմֆոնիկ նվագախումբը, ինչպես նաեւ Ձայնի պահպանման վոկալ-երգչախմբային մասնագիտական դպրոցի սաները: Վերջինիս գեղարվեստական ղեկավարը Կարինե Առաքելյանն է, խմբավարը՝ Լուիզա Գրիգորյանը: Մկրտիչ Բաբաջանյանը հավելեց նաեւ, որ փետրվարին օպերան կբեմադրվի:
Կարդացեք նաև
Վարդուհի ՏՈՆՈՅԱՆ
«Առավոտ» օրաթերթ
9.12.2019
