Այսօր Գյումրիում երկրաշարժի զոհերի հուշակոթողին ծաղկեպսակ դնելուց հետո նախագահ Արմեն Սարգսյանին տեսության եկավ գյումրեցի այն պապիկը, որը հեղափոխությունից երկու ամիս առաջ՝ 2018 թվականի փետրվարի 13-ին, Գյումրու Սուրբ Աստվածածին Յոթվերք եկեղեցում պատահաբար հանդիպելով այդ ժամանակ դեռ նախագահի թեկնածու Արմեն Սարգսյանին, նրան նախազգուշացրել էր մոտալուտ ապստամբության մասին։ Նա, դժգոհելով ՀՀԿ-ականներից, Արմեն Սարգսյանին ասել էր․ «Սերժ Սարգսյանին հաղորդեք, որ թոշակառուները կմեռնին, թոշակներն ավելացրեք, թե չէ ապստամբություն կեղնի, ավելի վատ բան կեղնի»։
Նախագահն, այսօր կրկին տեսնելով 82 տարեկան Լեվուշ Նահապետյանին, առանձնահատուկ ջերմությամբ ողջունեց նրան, հարցրեց առողջությունից։ «Հեռախոսդ ունեն, չէ՞, տղաները, զանգեմ, թեյ խմենք՝ որպես հին ընկեր»,- ասաց Արմեն Սարգսյանը։ Պապիկը նախագահին ցանկացավ հաջողություն՝ նշելով՝ թող հեռու վանվեն չար ուժերը։
«Ճիշտ նույն բանը ես եմ ուզում»,- ժպիտով արձագանքեց Արմեն Սարգսյանը։
Կարդացեք նաև
Ի դեպ, այսօր գյումրեցիներն Ամենափրկիչ եկեղեցու բակում հասցրեցին նախագահին փոխանցել իրենց նամակները, հարցուպատասխանի մեջ մտնել նրա հետ։
Երկրորդ խմբի հաշմանդամություն ունեցող մի անձ՝ Մարտին անունով, նույնիսկ ընդհատեց լրագրողների հետ նախագահի հարցազրույցն՝ ասելով, որ մի հարց էլ ինքն ունի ու հորդորելով հասարակական վայրերում սովորական բնակչից կարծիք հարցնել։
«Մեկ լուրջ խնդիր կա Գյումրիում ու Շիրակի տարածաշրջանում, առաջին խնդիրը՝ 1995 թվականից հանվեց երկրորդ խմբի հաշմանդամություն -ծերության 50/50 տոկոսները, ինչի՞ համար։ Խնդրում եմ այդ հարցին ուշադրություն դարձնել»,- ասաց նա։
Նախագահը լրագրողների հետ հարցազրույցից հետո լսեց նրա կողմից բարձրաձայնած խնդիրները։
Տարեց մի կին էլ, մոտենալով Արմեն Սարգսյանին, ասաց․ «Տան մեջ երեք հատ հաշմանդամ կա, խնդրում եմ նամակիս անձամբ դուք պատասխանեք, ուրիշի ձեռքը չտաք, կյանքիդ մեռնիմ, Աշոցքից եմ եկել, հասել»։
Նախագահն ասաց՝ եթե անհրաժեշտ լինի, նամակը կհանձնի կառավարությանը, որ պատասխանեն։
«Չէ, անձամբ դուք պատասխանեք»,- պնդեց տիկինը։
Նունե ԱՐԵՎՇԱՏՅԱՆ
