Այսօր ֆինանսների նախարար Ատոմ Ջանջուղազյանն անդրադարձավ պետական պարտք-ՀՆԱ հարաբերակցությանը՝ նշելով, որ Հայաստանը դասակարգված է պետական նվազ պարտքի բեռ ունեցող երկրների շարքում: Պարոն Ջանջուղազյանը լրագրողների հարցերին պատասխանեց Հանքավանում կազմակերպված «Պետական ֆինանսների կառավարման համակարգի 2019-2023 թվականների ռազմավարությունը» ներկայացնելիս:
Ըստ ֆինանսների նախարարի, բացի նրանից, որ մենք կունենանք համեմատաբար ցածր անվանական ցուցանիշ, կունենանք նաեւ պարտք-ՀՆԱ հարաբերակցության համեմատաբար ցածր հարաբերական ցուցանիշ. «Եթե մենք կանխատեսել էինք 2011-21 թվականների միջնաժամկետ ծախսերի ծրագրով, որ մենք աստիճանաբար իջնենք 50 տոկոսի շեմից ներքեւ, բայց, այնուհանդերձ, 2015 թվականին ունեինք 50 տոկոսը գերազանցող կառավարության պարտք-ՀՆԱ հարաբերակցություն, հիմա մենք կարծում ենք, որ այն կլինի 49 տոկոսից փոքր-ինչ ավել եւ 50 տոկոսից ցածր 2019 թվականի արդյունքներով: Իսկ 2020 թվականի արդեն հաստատված օրենքով գործառնությունները տեղի ունենալու արդյունքում այլ հավասար պայմաններում մենք ակնկալում ենք, որ համախառն ներքին արդյունքի հարաբերակցությամբ պարտքը կկազմի 48,2 տոկոս»:
Ատոմ Ջանջուղազյանը նաեւ անդրադարձավ այն մտահոգությանը, որ 2020 թվականին պետական պարտքը վճարելու պիկն է լինելու: Պարոն Ջանջուղազյանի խոսքով, պարտատոմսերի թողարկումն այդ խնդիրը լուծել է եւ այդ հարցն այլեւս արդիական չէ. «Կառավարությունը կարողանալու է այդ մեծ բեռը հաղթահարել»:
Կարդացեք նաև
Լուսինե ԲՈՒԴԱՂՅԱՆ
