Այսօր Երեւանի ավագանու արտահերթ նիստում ԲՀԿ խմբակցության անդամ Արմեն Ներսիսյանը ելույթի համար մոտեցավ ամբիոնին՝ ձեռքին ինչ-որ բան կար: «Ոնց որ երկու փողկապ ունեք, հա՞, ձեզ մոտ»,-հարցրեց քաղաքապետ Հայկ Մարությանը:
«Չէ, մեկը նվիրում եմ ձեզ, դե, դեմոկրատ երկիր ենք, դրա համար»,-պատասխանեց Ներսիսյանն ու փողկապը դրեց քաղաքապետի սեղանին:
«Ինչի՞ համար եք նվիրում, կարելի՞ է իմանալ»,-հարցրեց Մարությանը: Ներսիսյանն ի պատասխան ասաց.«Որ դուք էլ մեզ նման փողկապ կապեք»:
Մարությանն անմիջապես արձագանքեց. «Եթե թույլ տաք, ես սա վերանվիրեմ շեյխերին եւ շեյխուհիներին»: Մարությանի պատասխանը դահլիճում բուռն ծիծաղ առաջացրեց:
Կարդացեք նաև
«Չի կարելի նվերը նվեր տալ, պարոն քաղաքապետ: Ես ուղղակիորեն իրականում սրտանց նվիրեցի ձեզ, իսկ դուք տարաք հարցը նորից ուրիշ տեղ: Ես չեմ հասկանում, թե ինչ եք անում: Այս սրացումները չգիտեմ՝ ինչ է»,-ասաց Արմեն Ներսիսյանը:
Ապա Ներսիսյանն անցավ իր ելույթին, ասաց՝ 144 մանկապարտեզից 202 ծնող է իրեն դիմել. «Բավականին, մեկ տարի է ինձ խնդրում են, որ իրենց մանկապարտեզը բլվում է երեխաների վրա: Մանկապարտեզների գումարը տրամադրել են ուրիշ գործընթացների համար եւ ոչ մի մանկապարտեզ հիմնովին չի վերանորոգվել: Այս շքեղություններն այդքան կարեւո՞ր էին: Հասկանում եմ, դուք լավ կյանքով եք ապրում: Բայց այս շքեղությունները պետք չէ երեւանցիներին: Մանկապարտեզները վերանորոգեիք»: Ներսիսյանը շքեղություն ասելով նկատի ուներ, ինչպես ինքն ասաց՝ 700 հազար դոլար է տոնակատարությունների համար հատկացվող գումարը:
Նելլի ԲԱԲԱՅԱՆ
