Հայաստանը հրաժարվել է գերության մեջ գտնվող անձանց փոխանակությունից «բոլորը բոլորի դիմաց» սկզբունքով: Այս մասին հայտարարել է Ադրբեջանի արտգործնախարար Էլմար Մամեդյարովը:
«Ցավոք, Միլանի հանդիպումից մեկ տարի հետո եմ կարող խոսել Լեռնային Ղարաբաղի շուրջ հայ-ադրբեջանական հակամարտության կարգավորման գործում առաջընթացի բացակայության մասին: Շփման գծում այսօր համեմատաբար հանգիստ է, բայց միևնույն է, բանակցություններում առաջընթաց չկա: Չնայած այն բանին, որ ԵԱՀԿ ՄԽ համանախագահներն էլ են հայտարարում, որ ստատուս քվոն անընդունելի է, Հայաստանն անգամ հրաժարվել է Ղարաբաղում պահվող Ադրբեջանի քաղաքացիներին «բոլորը բոլորի դիմաց» սկզբունքով փոխանակումից»,- ասել է Մամեդյարովը ԵԱՀԿ արտգործնախարարների խորհրդի նիստին:
Նրա խոսքով՝ վերջին տարում Հայաստանի ղեկավարությունը մշտապես հանդես է եկել սադրիչ հայտարարություններով, որոնք հետևողականորեն ուղղված էին բանակցային գործընթացի տապալմանը:
Մամեդյարովն ընդգծել է, որ Հայաստանը մշտապես փորձում է փոխել բանակցությունների ձևաչափը: «1992թ. մարտի 24-ի ԵԱՀԿ փաստաթղթերում միանշանակ նշված է, որ հակամարտության կողմերն են Հայաստանն ու Ադրբեջանը, իսկ Լեռնային Ղարաբաղի ադրբեջանցի և հայ համայնքները շահագրգիռ կողմ են: Դրանով հանդերձ` հայկական կողմը փորձում է հայկական համայնքը ներկայացնել որպես «Լեռնային Ղարաբաղի ժողովուրդ»՝ դրանով մերժելով ադրբեջանական համայնքի առկայությունը»,- ասել է Մամեդյարովը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
