«Առաջարկել էի մի քանի ծրագրեր, այդ թվում՝ Վանաձորի երեք տնակային մանկապարտեզների նորոգման հարցը: Երկրաշարժից հետո դրանք գործում են տնակներում, որոնցից մեկն ազբեստապատ է: Եվրոպայում, ի դեպ, արգելված է ազբեստ օգտագործելը: Ինչո՞ւ առաջարկս չեք ներառել բյուջեի նախագծում, երեխաների առողջությունն առաջնային է: 30 տարի՝ այդ մանկապարտեզները գործում են տնակներում, իսկ երեխաները հաճախում են անմարդկային պայմաններով մանկապարտեզներ»,-ԱԺ հերթական նիստում, երբ քննարկվում է 2020թ.-ի պետբյուջեի նախագիծը, ՀՀ ֆինանսների նախարար Ատոմ Ջանջուղազյանին այսօր այսպիսի հարցադրում հղեց ԼՀԿ պատգամավոր Արմեն Եղիազարյանը:
Ատոմ Ջանջուղազյանը պատասխանեց՝ ճիշտ չէ տրամաբանությունը, երբ պատգամավորը կարծում է, թե իր առաջարկն է ամենակարեւորը. «Համեմատե՞լ եք՝ ձեր առաջարկներն ավելի՞ առաջնահերթ են, թե մյուսները: Ստացվում է, որ ով հակադրվի դրան, կդառնա երեխաների թշնամին…առաջարկում են նման մոտեցումը մերժել»:
Արմեն Եղիազարյանն արձագանքեց. «Վարչապետն ասում էր, որ այսօր գումարների խնդիր չունենք, եւ ներկայացվող ծրագրերը կիրականացվեն: Գտնում եմ, որ գումարները կան, պարզապես դուք ցանկություն չեք ունեցել այդ մանկապարտեզները նորոգելու: Եթե գումար կա, ինչո՞ւ չեք նախատեսել այդ հրատապ հարցը: Երեխաների առողջությունը հրատապ չի՞»:
Ատոմ Ջանջուղազյանը պատասխանեց. «Նման հարցադրմանն արձագանքել հնարավոր չէ»:
Լուսանկարներն Aravot.am-ին տրամադրել է պատգամավոր Արմեն Եղիազարյանը
Լուիզա ՍՈՒՔԻԱՍՅԱՆ
