«Որեւէ նախարարի հրաժարականի պահանջ չի կարող լինել քաղաքական զրո ազդեցություն ունեցող քաղաքական ուժի քմահաճույքի արդյունք»,-Կառավարություն-ԱԺ հարցուպատասխանի ժամանակ այսօր անդրադառնալով ՀՅԴ երիտասարդների՝ ԿԳՄՍ նախարար Արայիկ Հարությունյանի հրաժարականի պահանջին, հայտարարեց ՀՀ վարչապետ Նիկոլ Փաշինյանը:
Նա հավելեց. «Առավել եւս մի քաղաքական ուժի, որը երկար տարիներ ՀՀ-ում եղել է ապօրինի, կոռումպացված իշխանության կարեւոր հենասյուներից մեկը, եթե ոչ ավելին: Եթե այդ քաղաքական ուժը չառերեսվի այդ իրականության հետ եւ գնահատական չտա իր իսկ վերնախավի մի հատվածի հայտնի ժամանակաշրջանի գործունեությանը, ՀՀ-ում չի ունենա ապագա, որքան էլ դա ցավալի հնչի: Դա վերաբերում է ոչ միայն այդ քաղաքական ուժին, այլեւ նրանց, որոնք այդ ուժի հետ սեղանի շուրջ նստած էին: Մենք ընդամենը հեռացող գնացքի անիվների ձայնն ենք լսում. մի երգ կար՝ չուկ-չակ-չարակ-չակ…»:
Լուիզա ՍՈՒՔԻԱՍՅԱՆ
