«Էդ ի՞նչ ասելու բան էր, թող որեւիցե մեկը չասի, թե одолжение են արել, որ քվեարկել են Նիկոլ Փաշինյանի օգտին: Ժողովուրդը դուրս էր եկել փողոց ու չկար նման ուժ, որը կարող էր մերժել ՀՀ ժողովրդին, որովհետեւ ՀՀ ժողովրդի մերժումն այդ ուժին կտեւեր 15 րոպե: Իմ արձագանքը իրենց ելույթին համահունչ էր»,- լրագրողների հետ զրույցում ԱԺ փոխնախագահ Ալեն Սիմոնյանը այսպես բացատրեց իր կոշտ արձագանքը, որից հետո ԲՀԿ-ն քաղաքական բոյկոտ հայտարարեց ԱԺ նիստում:
Ալեն Սիմոնյանն ասաց. «Չփորձեն վաճառել մեր վրա որեւէ քվեարկություն, որովհետեւ դա չեն արել Նիկոլ Փաշինյանի, Ալեն Սիմոնյանի համար, իրենք դա արել են, ինչպես ասում էր Գագիկ Ծառուկյանը, ՀՀ ժողովրդի համար, թող գնան ու լսեն այդ օրերին պարոն Ծառուկյանի հայտարարությունը»:
Ալեն Սիմոնյանը հիշեցրեց, որ Նաիրա Զոհրաբյանը բազմիցս է քննադատել հետագիծ չունենալու հետ կապված. «Մի անգամ ասում է՝ Նիկոլ Փաշինյանը չլիներ՝ դուք ուր էիք, հետո ասում է՝ մենք չլինեինք՝ դուք ուր էիք, որ րոպեն մեկ իրենք ասում են, մենք պետք է դրան որեւիցե ձեւով չարձագանքե՞նք: Գեւորգ Պետրոսյանն էն մարդն էր, որը հոկտեմբերի 2-ին այստեղ՝ իր ձեռներով կազմակերպեցին այն քվեարկությունը, որի շնորհիվ ՀՀԿ-ականները փորձում էին այնպես անեին, որ ժողովուրդը չկարողանար իր կամքը արտահայտել»:
Հռիփսիմե ՋԵԲԵՋՅԱՆ
