Այսօր վաղ առավոտից Շիրակի պետական համալսարանի աշխատակիցները՝ դեկանների, ամբիոնի վարիչների գլխավորությամբ գործադուլ էին հայտարարել․ նրանք ռեկտորի ժ/պ Երվանդ Սերոբյանից պահանջում են չուշացնել աշխատավարձը, որն առանց այն էլ բավական ցածր է՝ համեմատած հանրապետության մյուս բուհերի։
Գործատուն, թեեև, ըստ աշխատանքային պայմանագրի, իրավունք ունի աշխատավարձը փոխանցել մինչև հաջորդ ամսի 15-ը, սակայն աշխատավարձի ուշացումը ծանր հոգս է դառնում նրանց համար․ ընկնում են տույժ-տուգանքների մեջ։ Գործադուլավորների ասելով, ելնելով այն հանգամանքից, որ բուհի նախորդ ղեկավարության օրոք աշխատավարձ ստացել են ամսի 2-ին կամ 3-ին, վարկերը բանկերում ձևակերպել են տվել հենց այդ օրերին մուծումներ կատարելու պարտավորությամբ։
Գործադուլավորներին վրդովեցրել էր նաև բուհի ժամանակավոր ղեկավարության՝ պարգևավճար չտալու մասին մտադրությունը։ Ըստ բողոքավորների, նման իրավունք չկա, քանի որ «13-րդ ամսվա աշխատավարձ» տողն արձանագրված է 2019 թվականի ՇՊՀ-ի եկամուտների և ծախսերի նախահաշվում։ Ըստ այդ փաստաթղթի՝ պարգևավճարի ֆոնդը 52 700 000 ՀՀ դրամ է, ճիշտ այնքան, որքան ծախսվել է 2018 թվականին:
Բուհի աշխատակիցները պահանջում են նաև փոխանցել դեկտեմբեր ամսվա աշխատավարձը։
Կարդացեք նաև
Աշխատակիցների փոխանցմամբ՝ ռեկտորի ժ/պ Երվանդ Սերոբյանը խոստացել է մինչև դեկտեմբերի 7-ը փոխանցել նոյեմբեր ամսվա աշխատավարձը, նա ասել է նաև, որ պարգևավճարը կտրամադրի մինչև դեկտեմբերի 15-ը։
Աշխատակիցների փոխանցմամբ, համաձայնության են եկել եռօրյա ժամկետում ստանալ իրենց հուզող հարցերի կոնկրետ պատասխանները, որոնց լուծման համար ռեկտորի ժ/պ-ն խոստացել է դիմել ՀՀ կրթության, գիտության, մշակույթի և սպորտի նախարարին։
Երվանդ Սերոբյանն աշխատավարձերի ուշացումը պարզաբանել է գանձապետարանից գումարների տրամադրումը ուշացնելու հանգամանքով։
Գործադուլավորները նշեցին, որ վաղը ու մյուս օր դասերը կշարունակեն, սակայն երկուշաբթի հստակ պատասխան չստանալու դեպքում՝ կվերսկսեն գործադուլը։
Հանդիպումը բավական թեժ է անցել։
Նունե ԱՐԵՎՇԱՏՅԱՆ
