Ռուսաստանի արտգործնախարար Սերգեյ Լավրովը Ադրբեջան իրականացրած պաշտոնական այցի շրջանակում հանդիպել է Ադրբեջանի իր գործընկեր Էլմար Մամեդյարովի հետ:
«Կարող եմ միայն ընդգծել, որ ռազմատեխնիկական համագործակցությունը Մոսկվայի և Բաքվի միջև ռազմավարական գործընկերության կարևորագույն ոլորտներից մեկն է: Զարգացնում ենք ռազմատեխնիկական գործակցությունը՝ համաձայն միջազգային օրենսդրության, հաշվի առնելով տարածաշրջանում հավասարակշռությունը և կայունությունը պահպանելու կարևորությունը»,- ասել է Լավրովը, որի խոսքերը մեջբերում է ադրբեջանական Trend գործակալությունը:
Հատկանշական է, որ Ռուսաստանի ԱԳՆ կայքում հանդիպման արդյունքներն ամփոփող հաղորդագրության մեջ նման հատված չկա:
Իր հերթին, Մամեդյարովը խոսել է դեկտեմբերի 4-ին Բրատիսլավայում Հայաստանի և Ադրբեջանի արտգործնախարարների սպասվող հանդիպման մասին: «Ինչ է անվտանգությունը մեր ընկալմամբ և Հայաստանի ընկալմամբ: Կա ընկալում, որ առաջին հերթին զինված ուժերը պետք է վերադառնան զորամասեր: Այո՛, անվտանգությունը կարևոր է: Բայց Ադրբեջանի համար կա նաև Ղարաբաղի բնակչությունը: Մենք դիմել ենք համանախագահներին՝ պատրաստելու իրավիճակի գնահատման և անվտանգության հարցի լուծման վերաբերյալ զեկույց: Դրա համար անհրաժեշտ են լուրջ առարկայական բանակցություններ: Ես կարծում եմ, որ վաղը մենք կբացենք այդ բանակցությունները»,- ասել է Մամեդյարովը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
