Նախկին զինդատախազ Գագիկ Ջհանգիրյանը վիճարկել է այժմ կալանքի տակ գտնվող նախկին նախագահ Ռոբերտ Քոչարյանի երկու հրամանագրերը: Նա պահանջում է առ ոչինչ ճանաչել իրեն՝ գլխավոր դատախազի տեղակալի պաշտոնից ազատելու, ինչպես նաև արդարադատության առաջին դասի պետական խորհրդականի դասային աստիճանից զրկելու մասին հանրապետության նախագահի հրամանագրերը:
Հիշեցնենք, որ 2008 թվականի նախագահական ընտրություններից հետո Գագիկ Ջհանգիրյանը միացել էր Լևոն Տեր-Պետրոսյանի թիմի քաղաքական պայքարին: Նա ելույթներ էր ունենում Ազատության հրապարակում:
Ելույթի հաջորդ օրը՝ փետրվարի 23-ին, Արգավանդի խաչմերուկից ապօրինի զենք կրելու համար նա բերման ենթարկվեց: Գագիկ Ջհանգիրյանը եղբոր հետ դատապարտվեց ոստիկանի նկատմամբ բռնություն գործադրելու համար:
Այսօր լրագրողների այդ մասին հարցին ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը այսպես պատասխանեց. «Գագիկ Ջհանգիրյանը փորձում է, թող անի… չգիտեմ էլ՝ ինչպես վերաբերվեմ: Ինչքանով ես եմ հասկանում, նման պաշտոն ունեցող մարդը չպետք է քաղաքականությամբ զբաղվի»:
Կարդացեք նաև
Լրագրողները Լեւոն Քոչարյանից հետաքրքրվեցին նաեւ, թե ինչպես է վերաբերվում այն հայտարարություններին, ըստ որոնց՝ Երեւանի նախկին ոստիկանապետ Աշոտ Կարապետյանի մահը կապվում է Մարտի 1-ի գործի հետ: «Չեմ զարմանում, այն մարդիկ են այդպես խոսում, ովքեր մեծ հաշվով թքած ունեն թե զոհերի վրա, թե մարտի մեկի տուժողների վրա: Դա, սակայն, ստորություն է»,- պատասխանեց Լեւոն Քոչարյանը:
Նելլի ԳՐԻԳՈՐՅԱՆ
