ԱԺ փոխնախագահ Ալեն Սիմոնյանը հարցին՝ ընդդիմադիրները կարծում են, որ ՍԴ անդամներին վաղ կենսաթոշակի ուղարկելու քայլը իշխանությունների կողմից բացեիբաց կաշառք է, ինչպե՞ս կմեկնաբանեք՝ պատասխանեց. «Եթե կարծիք է հնչում, որ դա կաշառք է, ուրեմն նշանակում է, որ այն դատավորները, որոնց մասին խոսք է գնում, պնդում է կատարվում, որ իրենք կաշառակեր են»:
Ըստ Ալեն Սիմոնյանի, նվաստացուցիչ ոչինչ չկա. «Եկեք չճնշենք դատավորներին, խոսքը վերաբերում է մի ամբողջ համակարգի, որոշ դատավորներ կարծիք են հայտնել, որ կօգտվեն այդ իրավունքից, եկեք չճնշենք»:
Նախագծին հակադարձում են, որ ոչինչ չանելու դիմաց բյուջեից հսկայական գումար են տրամադրում, մինչդեռ այդ գումարը այլ տեղեր կարելի էր ծախսել՝ Ալեն Սիմոնյանն արձագանքեց. «Յուրաքանչյուր գումար էլ այլ տեղ կարելի է ծախսել ու նման բան ասել յուրաքանչյուր հարցի հետ կապված: Բայց դատավորի հետ կապված չենք կարող ասել, որ նա ոչինչ չի արել»:
Հարցին՝ եթե դատավորները չօգտվեն այս հնարավորությունից, ինչպե՞ս եք լուծելու ՍԴ ճգնաժամի հարցը՝ Ալեն Սիմոնյանը պատասխանեց, որ «ՍԴ-ի ճգնաժամի հարցը լուծված է, որովհետեւ այն խնդիրները, որոնք կան այնտեղ, թույլ չեն տալու, որպեսզի շարունակվի այն իրավիճակը, որը կար մինչ օրս: Այդ հարցը ժամանակին լուծվելու է, թող որեւէ մեկի մոտ կասկած չլինի»:
Կարդացեք նաև
Ալեն Սիմոնյանն ասաց, որ իրենք այս քայլն են ձեռնարկում, որ չլինեն խոսակցություններ, թե ճնշում է գործադրվում, այն էլ՝ մի համակարգի վրա, որը տարիներ շարունակ սպասարկել է իշխանություններին. «Ամեն ինչ արվում է օրինականության սահմաններում ու ամեն ինչ արվում է, որ լինի ցնցումներից զերծ: Սա հնարավորություններից մեկը կարող է լինել դատական համակարգում առկա ճգնաժամը լուծելու համար»:
Հռիփսիմե ՋԵԲԵՋՅԱՆ
