ԱԺ փոխնախագահ, «Իմ քայլը» խմբակցության պատգամավոր Ալեն Սիմոնյանին հարցրեցինք՝ Գագիկ Ջհանգիրյանը դիմել է վարչական դատարան՝ վերականգնելու իր նախկին պաշտոնը՝ գլխավոր դատախազի տեղակալի, եւ գտնում է, որ իրեն ապօրինի են 2008-ին աշխատանքից ազատել ու կոչումներից զրկել, նոր Հայաստանում կարո՞ղ է Գագիկ Ջհանգիրյանը պաշտոն ունենալ եւ տեղ ունենալ՝ Ալեն Սիմոնյանը պատասխանեց. «Հստակ է՝ եթե խախտվել է օրենք՝ այն պետք է վերականգնվի, վստահ եմ, որ պարոն Ջհանգիրյանի գործը եզակի չի լինելու: ՀՀ-ում բազմաթիվ դատական հայցեր են լինելու՝ նախկին իշխանությունների իրականացրած գործողությունների հետ կապված»:
Անդրադառնալով Երեւանի քաղաքապետ Հայկ Մարությանի հրաժարականի պահանջին ու քննիչ հանձնաժողովի ստեղծմանը՝ Ալեն Սիմոնյանն ասաց. «Հայկ Մարությանի հրաժարականի որեւիցե անհրաժեշտություն չկա: Չեմ մեղադրում պարոն Մարությանին որեւիցե ձեւով որեւիցե հարցի շուրջ: Նա մնացել է իր գործառույթների մեջ, օրենսդրական առումով որեւէ խախտում չեմ տեսնում, այլ հարց է, որ միգուցե օրենսդրական բաց գոյություն ունի, որն այսօր ընդդիմությունը շահարկում է: Նվիրատվությունների կարգը, ինչպես պետք է հայտարարի, ով պետք է հայտարարի, կամ ընդհանապես քաղաքապետը ինչու պետք է զբաղվի, ամեն ինչը վերցնի իր վրա»:
Ինչ վերաբերում է շինթույլտվություններին՝ այստեղ նույնպես Ալեն Սիմոնյանը խնդրահարույց ոչինչ չի տեսնում: Ըստ նրա, բազմաթիվ շինթույլտվություններ են տրվել ու նման կերպ մտածել՝ նշանակում է հին տրամաբանությամբ շարժվել. «Այն մարդիկ, որոնք ենթադրել են, որ կարող են «Կամազի» դիմաց ինչ-որ բան անել, դա հին տրամաբանության, հին մտածելակերպի մեջ է»:
Հարցին՝ «Իմ քայլը» կմիանա՞ քննիչ հանձնաժողովի ստեղծման նախաձեռնությանը՝ Ալեն Սիմոնյանն ասաց, որ չեն քննարկել այդ հարցը գործընկերների հետ:
Կարդացեք նաև
Հռիփսիմե ՋԵԲԵՋՅԱՆ
