«Մենք մեկ միասնական փաթեթ ունենք, որում կան խնդրի կարգավորմանն առնչվող հարցեր: Կան նաեւ կարեւոր հարցեր, որոնք վերաբերում են այն միջավայրին, որում տեղի է ունենում խաղաղ կարգավորման գործընթացը: Բոլոր հարցերը նշանակալի են ամբողջության մեջ»,-դեկտեմբերի 4-ին Ադրբեջանի իր պաշտոնակցի՝ Էլմար Մամեդյարովի հետ սպասվելիք հանդիպման օրակարգին անդրադառնալով՝ այսօր լրագրողների հետ ճեպազրույցում ասաց ՀՀ ԱԳ նախարար Զոհրաբ Մնացականյանը:
https://www.facebook.com/aravot.am/videos/756846424742176/
Նա հիշեցրեց, որ հայկական կողմի դիրքորոշումը եւ գերակայությունները հայտնի են. «ԼՂ անվտանգություն եւ ստատուս: Մենք շարունակելու ենք մշակել այն մոտեցումները, որոնք միտված կլինեն մեր գերակա հարցերի արտահայտմանը: Խիստ նշանակություն ենք տալիս այն մեխանիզմներին եւ միջոցառումներին, որոնք միտված են էսկալացիայի ռիսկերի նվազմանը: Զինադադարի ռեժիմը պետք է ամրապնդվի: Արցախյան հակամարտության համատեքստում հայկական կողմը հավատարիմ է խաղաղ կարգավորմանը»:
Լուիզա ՍՈՒՔԻԱՍՅԱՆ
