Ամիսներ առաջ «Հայելի» մամուլի ակումբի վրա հարձակման դեպքի առթիվ ընթացող նախաքննությունը, ըստ ակումբի նախագահ, լրագրող Անժելա Թովմասյանի եւ նրա շահերի ներկայացուցչի, ձեւական բնույթ է կրում. նրանք անգործության միտումներ են նկատում: «Հայելի» մամուլի ակումբում այսօր լրագրողների հետ հանդիպմանը Անժելա Թովմասյանը կատարվածը որակեց որպես ոտնձգություն` խուլիգանական գործողություն. «Քննչականում ասում են, թե բավարար փաստեր չունեն, բայց էլ ի՞նչ փաստեր պետք է լինեին, որպեսզի կատարվածը որակեին որպես սպառնալիք, ոտնձգություն եւ խուլիգանություն: Նիկոլ Փաշինյանը, չարձագանքելով այս կամ այն դեպքին եւ խուլիգանական գործողությանը, նպաստում է դրանց շարունակականությանը: Երբ այդ խուժաններն «Օպերայի» հարակից տարածքից հայտարարում են, որ պետք է Արցախի նախագահի գլուխը ջարդեն, հետո հարձակվում Հրանտ Մարգարյանի վրա, հետո թքում փաստաբանի մեքենայի վրա, անշնորհք հայտարարություններով հանդես գալիս…ինչպես ասում է Հակոբ Ավետիքյանը, մեր շատախոս վարչապետը լռում է: Ամեն ինչին արձագանքում է, իսկ խուլիգանական գործողություններին՝ ոչ»:
Անժելա Թովմասյանը նկատեց. «Գոնե մի հարցում վարչապետն ազնիվ է, երբ ասում է, որ «ես ձեզ սիրում եմ»: Նա իսկապես մեզ սիրում է, բայց մի տարբերությամբ: Այս պարագայում նա սիրում է խուլիգանին, որն իր գործողությունների մեջ ավելի ակտիվ է դարձել»:
Թովմասյանի փոխանցմամբ՝ շաբաթ օրը եղել են Քննչական կոմիտեում եւ ծանոթացել գործի ընթացքին:
Անժելա Թովմասյանի շահերի ներկայացուցիչ, փաստաբան Զարուհի Փոստանջյանը ներկայացրեց մանրամասները. «Երկու ամիսը բավարար էր, որ նախաքննությունն ավարտվեր եւ գործն ուղարկվեր դատարան: Բայց պարզվում է, որ նման գործի պարագայում երկու ամիսը բավարար չէ ՔԿ-ին՝ կատարվածին քրեաիրավական գնահատական տալու համար: Բավարար չէ նաեւ խուլիգանության եւ խտրականության դրվագներով մեղադրանք հարուցելու համար: Կատարվածը ոչ միայն լրագրողի աշխատանքի խոչընդոտում էր, այլեւ խուլիգանության եւ խտրականության դրսեւորում: Հարձակում էր եղել ակումբի հանդեպ՝ խուլիգանական արարքի միջոցով, որը հանրորեն վտանգավոր է: Այն հիմքում ունեցել է խտրականություն»:
Կարդացեք նաև
Փոստանջյանն ասաց, որ ՔԿ-ի գործողությունները ոչ բավարար են գնահատում. «Նրանք անգործության են մատնված: Սա դիտարկում եմ որպես ուղղորդված անգործություն, որովհետեւ գլխավոր դատախազը տեղյակ է մեր բողոքներից, բայց դրանց քննությունն եւ բավարարումը մատնել է անգործության: Գործադիր իշխանությունն, ի դեմս Նիկոլ Փաշինյանի, ուղղորդում է, որպեսզի մեղավորները չպատժվեն»:
«Մեդիա պաշտպան» նախաձեռնության ղեկավար, քաղաքագետ Աղասի Ենոքյանն էլ կարծիք հայտնեց, որ ՀՀ նոր իշխանությունը ԶԼՄ-ների հանդեպ որդեգրել է խտրականության եւ իրեն ոչ հաճելիներին լռեցնելու քաղաքականություն. «Այդ խուլիգանները համոզված են, որ իրենք չեն պատժվելու: Իշխանական պատվեր կա, որ այս գործը ձգձգվի, մինչեւ ամեն ինչ կմոռացվի-կանցնի»:
Մանրամասն՝ տեսանյութում
https://www.facebook.com/aravot.am/videos/745554285960146/
Լուիզա ՍՈՒՔԻԱՍՅԱՆ
