ՍԴ անդամ Ալվինա Գյուլումյանը քանիցս լրագրողների հետ զրույցում հավաստիացրել է, որ ՍԴ-ի շուրջ որեւէ ճգնաժամ չկա: Այն, որ հանրային խորը անվստահություն կա դատական համակարգի նկատմամբ, այդ թվում՝ ՍԴ որոշումների նկատմամբ եւ դրա համար հիմք է ծառայել օրվա իշխանությունների քիմքին համապատասխան որոշումներ կայացնելը՝ ընտրական վեճերը լուծելիս, Ալվինա Գյուլումյանը նույնպես չի ընդունում:
Նա մի առիթով պատասխանելով մեր հարցին՝ ասաց. «Ցավոք սրտի, գիտե՞ք ինչ է կատարվում, մեր փաստաբանները, կամ կողմի ներկայացուցիչները երբեմն գործը լավ չնախապատրաստելով, բավարար ապացույցներ դատարանին չներկայացնելով՝ այսպես ասած քավության նոխազ են գտնում դատարանին»: Դիտարկմանը, որ հասարակության ցանկացած անդամի մոտենաք ու հարցնեք, կասի, որ կեղծվել են ընտրությունները՝ Գյուլումյանն արձագանքեց. «Հա, բայց մենք չենք կարող հասարակության այդ կարծիքը դնել… համոզմունք կարող է լինել, համոզմունքին պետք է հիմնավորող ապացույցներ լինեն: Մենք ապացույցներն ենք դնում վճռի հիմքում: Եթե ապացույց չի ներկայացվում, ամենաակնհայտ գործն էլ կարող է արդյունք չունենալ»:
Aravot.am-ի հետ զրույցում մեր զարմանքին, որ, փաստորեն, ինչքան էլ դուք հոգու խորքում վստահ լինեք, որ ընտրությունները կեղծված են, այլ որոշո՞ւմ եք կայացնում՝ տիկին Գյուլումյանը պատասխանեց. «Ես ինքս կարող եմ շատ վստահ լինել, բայց եթե դատարան ապացույց չբերեցին, ես ոչինչ անել չեմ կարող: Ես չեմ կարող ասել՝ ես լսել եմ, կամ ես տեսել եմ, իմ աչքի առաջ լցոնում է եղել: Ես կարող եմ ընդամենը լինել ցուցմունք տվողներից մեկը, բայց այդ դեպքում պետք է գործի քննությանը չմասնակցեմ»:
Դիտարկմանը, որ ընդդիմադիր թեւը միշտ հարյուրավոր էջերով փաստարկներ է ներկայացնում, նաեւ դիտորդական առաքելությունները՝ Ալվինա Գյուլումյանն ասաց. «Ես ձեզ խորհուրդ կտամ գաք այդ հարյուրավոր էջերից դատարանում մի հատ ընտրական վեճի գործ վերցնեք եւ սկսեք կարդալ: Ընդ որում, ես ձեզ ասեմ՝ 96-ի ընտրական վեճը քննելիս դա հնարավոր էր, որովհետեւ այն ժամանակ օրենքով սահմանափակում չունեինք, այսինքն, Սահմանադրական դատարանը ինքը կարող էր ընդհուպ արկղերը բացել, քվեաթերթիկները ստուգել: Հետո եղավ օրենքում փոփոխություն ու ՍԴ-ն կարող է հիմք ընդունել միայն խախտումների վերաբերյալ ապացույցները, որոնք ընդհանուր իրավասության դատարանում վիճարկվել են: Դատական գործեր պետք է բերեն, կամ որոշումները, որոնցով արձանագրվում է խախտումը, կամ էլ գոնե դիմում, որը չի քննարկվել դատարանում»:
Կարդացեք նաև
Մենք նաեւ հարցրեցինք՝ ձեզ երբեւէ որեւէ գործով չե՞ն զանգել կամ միջնորդավորված փորձել ասելիքը տեղ հասցնել՝ Ալվինա Գյուլումյանը պատասխանեց. «Եթե ինչ-որ մեկը փորձեր, իր պատասխանը կստանար եւ դրանով կվերջանար»: Ճշտեցինք՝ այսինքն, զանգովի արդարադատություն ձեր հետ կապված չի՞ եղել՝ նա պատասխանեց. «Ես կարող եմ երդվել իմ միակ երեխայով, ինձ մոտ չի եղել»:
Հռիփսիմե ՋԵԲԵՋՅԱՆ
