ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն առայժմ չի ցանկանում մեկնաբանություններ տալ «Իմ քայլը» խմբակցության պատգամավոր Հայկ Սարգսյանի կողմից շրջանառության մեջ դրված աղմկահարույց նախագծի մասին:
«Պատգամավորը ինչ-որ ուսումնասիրություններ է արել, որտեղ կան հետաքրքիր էլեմենտներ, ինչը չի նշանակում, որ այդ էլեմենտները ամբողջական են և պետք է մտնեն արդեն որպես օրենք: Բայց այստեղ կան հետաքրքիր առաջարկներ, որոնք կարող են ներառվել նաև այլ օրենքների մեջ»:
Երեկվանից աղմուկ հանած այս նախագծով, իշխող ուժի պատգամավորն առաջարկում է, որ պարտադիր զինվորական ծառայությունից խուսափած ՀՀ քաղաքացիները 10 մլն ՀՀ դրամ վճարելով`ծառայեն մեկ ամիս՝ արագացված ընթացակարգով, ապա որոշեն` շարունակե՞լ ծառայությունը, թե՞ ոչ:
Այսօր խորհրդարանում լրագրողների հետ զրույցում Անդրանիկ Քոչարյանը միայն ասաց, որ հանձնաժողովի քննարկումներում ոչ մի վիճահարույց հարց չի մնում:
Կարդացեք նաև
Բանախոսը նաեւ ասաց, որ «Իմ քայլը» խմբակցության պատգամավոր Մխիթար Հայրապետյանի, Արման Բաբաջանյանի և իր նախաձեռնությամբ շրջանառության մեջ է դրվել այլ նախագիծ, որում առաջարկում են խստացված իրավակարգավորումներ` 27 տարին լրացած և ծառայություն չանցած քաղաքացիների համար. «Առաջարկել ենք այնպիսի մեխանիզմ, որոնք մեր պատկերացմամբ լուծելու են համակարգային խնդիրներ. օրինակ, առաջնագծում փոփոխությունները, որոնք կբերեն որակական փոփոխությունների»:
Նելլի ԳՐԻԳՈՐՅԱՆ
