«Մենք այնքան ենք քննարկելու, բանակցելու մինչև գալու ենք մի իրավիճակի, որ երեքն էլ կգան, կնայեն և կասեն այս տարբերակին համաձայն են»․ – «Տեսակետ» մամուլի ակումբում լրագրողների հետ հանդիպմանն ասաց «Մարդկային զարգացման միջազգային կենտրոնի» ղեկավար Թևան Պողոսյանը։ Նա կարևորեց դեկտեմբեր ամսին կայանալիք ԵԱՀԿ գագաթնաժողովը, որի ընթացքում նախատեսվում է պաշտոնական հանդիպում Հայաստանի և Ադրբեջանի արտաքին գործերի նախարարների միջև, ինչպես նաև կհանդիպեն ԵԱՀԿ Մինսկի խմբի համանախագահները․ «Ամենակարևոր հարցերից մեկը, որը քննարկվելու է, դա մեր լրագրողների փոխայցելությունն է կամ, ինչպես իրենք են օգտագործում իրենց բառապաշարում՝ «գործողություններ, որոնք միտված են վստահության վերականգնման»։ Նաև օգտագործում են՝ «ժողովուրդներին խաղաղության պատրաստելու» ձևակերպումը, բայց պետք է գիտակցել, որ մեկ այցով կամ նույնիսկ տարիների ընթացքում այցեր կատարելով, կամ ծրագրեր իրականացնելով վստահություն չի ձևավորվում»․- հավելեց Թևան Պողոսյանը։
Նախկին պատգամավորի խոսքով, Ադրբեջանում ձևավորվել է երիտասարդ սերունդ, որին երկրի իշխանություններն ուղարկել են արտասահմանում սովորելու ու նախապատրաստում են քաղաքական դաշտ բերելու․ պատճառը մեկն է՝ Ալիևը ցանկանում է իր իսկ ապահովության համար ազատվել արդեն ձևավորված ծերակույտից, ներքաղաքական պառակտումներից կամ հնարավոր հեղաշրջումներից։
Թևան Պողոսյանի համոզմամբ գալիք տարի Արցախում սպասվող ընտրությունները, երկրի պետականության գոյությունն ընդգծող, ինչպես նաև Արցախի Հանրապետության զարգացվածությունն աշխարհին ի ցույց դնելու լավագույն օրինակն է լինելու։ Թևան Պողոսյանի կարծիքով՝ Հայաստանը պետք է հայտարարությամբ դիմի միջազգային հանրությանը՝ ուշադրությունը սևեռելու այն փաստի վրա, որ Հայաստանը, բացի Արցախի անվտանգության երաշխավորը լինելուց, նրան օգնելու է նաև ժողովրդավարության զարգացման հարցում։
Կարդացեք նաև
Մարիամ ԱՎԱՆԵՍՅԱՆ
