Եվս մեկ անգամ արդեն անդրադառնալ նախագծին, որով նախարարությունն առաջարկում է ԲՈՒՀ-երում հայոց լեզվի, գրականության, պատմության դասավանդումը պարտադիրից դարձնել կամավոր, մեզ ստիպեց նախարար Արայիկ Հարությունյանը, նրա՝ բողոքի ակցիա անցկացնող երիտասարդների և ուսանողների հետ հանդիպման և հարցի քննարկման առաջարկի անհարկի մերժումը և տարբեր ԲՈՒՀ-երի դասախոսների հետ զրույցի ընթացքում դրսևորած կեցվածքը: Պարզ դարձավ, որ նախարարին չի հետաքրքրում իր տեսակետի հետ չհամաձայնվողների կարծիքը և առաջարկները:
Սա նախարարի այդօրինակ կեցվածքի միակ դրսևորումը չի: Նախարարության կողմից օրակարգ է նետված և փորձ է արվում իրականացնել մի շարք նախաձեռնություններ, որոնք ուղղված են ազգային արժեհամակարգի և հաստատությունների դեմ՝ տարակուսանք և ընդվզում առաջացնելով հանրության շրջանում:
Ինչու, օրինակ, ԿԳՄՍ նախարարությունը վերոհիշյալ նախագծի փոխարեն չներկայացրեց հայոց լեզվի և մյուս հայագիտական առարկաների ուսուցման նոր ռազմավարություն, որի քննարկման արդյունքում կարող էր առաջ գալ բարեփոխումների ամբողջական փաթեթ: Այո, բարեփոխումները հատվածական բնույթ չպետք է կրեն: Առավել ևս, որ դրանց իրականացումը կասկածի տակ է դնում ազգային ինքնության պահպանումը և զարգացումը:
Դիմում ենք ՀՀ կառավարությանը՝ հանձնարարել ԿԳՄՍ նախարարությանը
Կարդացեք նաև
- Մշակել նոր ռազմավարություն, նրանում ներառել հայագիտական կրթության շարունակականությունը, սկսած նախակրթարանից մինչև բակալավրիատ և մագիստրատուրա:
- Ձեռնամուխ լինել նոր պահանջներին համապատասխան դասագրքերի և մեթոդաբանական նյութերի մշակմանն ու հրատարակմանը
- Ավագ դպրոցներում և ԲՈՒՀ-երում սահմանել հայագիտության ծրագրի դասակարգված /ըստ մասնագիտությունների/ պարտադիր ուսուցման բաղադրիչներ:
- Հանրային քննարկումների արդյունքում ձեռքբերված մասնագիտական համաձայնությունը ամրագրել օրենքում:
21-րդ դարում կրթական համակարգին ներկայացվող պահանջները չեն կարող բավարարել, եթե բարեփոխումների ընթացքում չառանձնացվի կրթողի՝ ուսուցչի, դասախոսի սոցիալական կարգավիճակը, հասարակական դերը և արժեքը: Պետական բարձրաստիճան ծառայողների աշխատավարձերը և պարգևավճարները շեշտակի բարձրացնելուց առաջ, կառավարությունը պարտավոր էր դպրոցի ուսուցչին և ԲՈՒՀ-ի դասախոսին վարձատրել հասարակության առջև իր պատասխանատվության համապատասխան չափով:
Հայաստանի դեմոկրատական կուսակցությունն իր գոհունակությունը և զորակցությունն է հայտնում բուհական ուսանողներին և երիտասարդներին, ովքեր հետևողական են իրենց պահանջում՝ պաշտպանելու ազգային արժեհամակարգից բխող մայրենի լեզվի տիրապետումը, պահպանումը, զարգացումը և տարածումը:
Հայաստանի դեմոկրատական կուսակցության նախագահություն
