ՀՀ նախկին գլխավոր դատախազ Գեւորգ Կոստանյանը «Մարտի 1»-ի գործով ներգրավվել է իբրեւ մեղադրյալ: Նախկին ոստիկանապետ Ալիկ Սարգսյանին նույն գործով առաջադրված մեղադրանքում էլ դրվագներ կան, որ «Մարտի 1-ից» հետո Գեւորգ Կոստանյանը 25 կետից բաղկացած հարցաշար է առաջադրել ոստիկանության ծառայողներին, որպեսզի «կոծկեն» տեղի ունեցած իրադարձությունները:
Այսօր լրագրողների հետ զրույցում, անդրադառնալով այս դրվագներին, «Մարտի 1»-ի Փաստահավաք խմբի նախկին անդամ Անդրանիկ Քոչարյանն ասաց. «Դուք եթե նայել եք փաստահավաք խմբի փաստաթղթերը, կտեսնեիք, որ խեղճ Դաստակովին էդ վիճակին հասցրել է Գեւորգ Կոստանյանը: Ավտոմատներ են բաժանել չգիտեմ ում եւ այլն, այսինքն, խնդիր էր դրված, որ մեր կասկածները`բանակի մասնակցությունը տեղի ունեցող իրադարձություններից, հեռացնել: Ըստ էության, կեղծիքների շնորհիվ եւ կեղծիքների ճարտարապետը, պարզվում է եղել է նախագահականում նստած Գեւորգ Կոստանյանը»:
Ի դեպ, Գեւորգ Կոստանյանի նկատմամբ արդեն հետախուզում է հայտարարվել` կալանավորման միջնորդությամբ:
«Չգիտես ինչի, ինչ որ մարդիկ, որ կատարել են քաղաքական պատվեր «Մարտի 1»-ի գործով, նրանք բոլորը դատապարտված են փախնել Հայաստանից`դրանով արժեզրկելով թե իրենց պաշտոնավարման տարիները, թե իրենց, թե իրենց անվան հետ կապված մարդկանց ճակատագիրը. Կոստանյան, Միքայել Հարությունյան, Վահագն Հարությունյանը… Նրանք պետք է գիտակցեն, որ անընդհատ փախուստի մեջ խնդիրը չի լուծվում, ընդհակառակը, խնդիրը լուծվում է վերադառնալով ՀՀ: Ի՞նչ է, պետք է Հրանուշ Հակոբյա՞նը դիմեր «Արի տուն» ծրագրով: Նախաքննական մարմինը երբ ասում է`պետք է գան, իրենք պետք է գան: Խուսափել`նշանակում է լինել հանցագործ»,- ասաց Անդրանիկ Քոչարյանը:
Կարդացեք նաև
Նելլի ԳՐԻԳՈՐՅԱՆ
