Պաշտոնից հեռացած ԱԱԾ նախկին ղեկավար Արթուր Վանեցյանը վերջերս 168.am կայքին տված հարցազրույցում, ի պատասխան լրագրողի հարցին` մեր երկրի սահմանները վտանգվա՞ծ են, ասաց`չեմ պատասխանի այդ հարցին: Այսօր խորհրդարանում, լրագրողների հետ զրույցում ԱԺ պաշտպանության, ազգային անվտանգության հարցերի հանձնաժողովի նախագահ Անդրանիկ Քոչարյանն անդրադառնալով ԱԱԾ նախկին ղեկավարի հարցազրույցին, ասաց, որ հրաժարականից հետո պարոն Վանեցյանը շատ հակասական բաներ է անում եւ ասում:
Անդրանիկ Քոչարյանը վերահաստատեց իր մոտեցումը`նման կառույցների ղեկավարներն աննկատ են հեռանում: «Առեղծվածներ ոչ ոք իրավունք չունի ստեղծելու: Դա այն պաշտոնն է, որ նույնիսկ չպատասխանելով, ինքը երկրի անվտանգությանը վնասում է: Հարցը տվողը տալիս է, որ կասկածամտություն ստեղծվի»,-կարծում է պարոն Քոչարյանը` հավելելով, որ չի հիշում մեր երկրում որեւէ նման այլ պաշտոնյայի, որը պաշտոնանկությունից հետո նման քաղաքական ակտիվություն է դրսեւորել:
«Արժեր, որ պարոն Վանեցյանը գիտակցի, թե ինք ինչ պաշտոն է զբաղեցրել»,- ասաց Անդրանիկ Քոչարյանը` հավելելով, որ անգամ պաշտոնը թողնելուց հետո ինքը հանդիսանում է երկրի անվտանգության պաշտպան:
Անդրանիկ Քոչարյանը չցանկացավ քննարկել Արթուր Վանեցյանի եւ Կիլիկիո կաթողիկոսի լուսանկարը, որը հրապարակվել էր վերջերս:
Կարդացեք նաև
Նելլի ԳՐԻԳՈՐՅԱՆ
Լուսանկարը՝ արխիվային
