Դիմահարդար Լուիզա Գրիգորյանը՝ 2020թ. հարդարման միտումների մասին
Դիմահարդարումը մեր օրերում աղջիկների եւ կանանց առօրյայի անբաժանելի մասն է կազմում։ Յուրաքանչյուր կին ցանկանում է ընդգծել դիմագծերը ճիշտ, տոնին համապատասխանող դիմահարդարմամբ։ Թեմայի վերաբերյալ զրուցեցինք դիմահարդար Լուիզա Գրիգորյանի հետ՝ պարզելու, թե ինչպիսի դիմահարդարմամբ արժե դիմավորել 2020 թվականը, որն ըստ հորոսկոպի՝ մկան կամ սպիտակ առնետի տարի է:
«Ամանորին խորհուրդ կտամ աչքերին կրել սպիտակ մետալիկ փայլեր (այս տարվա խորհրդանիշ մկնիկը սիրում է փայլեր)»,- ժպտալով պարզաբանեց դիմահարդարը։
Ինչ վերաբերում է մաշկին, Լուիզան նշեց, որ հիմնականում ընտրում է թաց էֆեկտը, լավ խոնավեցված եւ սնուցված մաշկը. «Ամանորի գիշերը շրթներկը կարելի է անել ավելի վառ, որպեսզի ընդգծենք ամանորյա տրամադրությունը. մի խոսքով, այս տարի պետք է ընտրել նրբագեղությունը»,- հավելեց դիմահարդարը։
Հետաքրքրվեցինք նաեւ, թե ինչպիսի դիմահարդարումն է նորաձեւ համարվում 2020 թվականի համար: Լուիզա Գրիգորյանը պատասխանեց, որ նորաձեւ են շարունակում մնալ նախորդ տարիների դիմահարդարումները. «Օրինակ, նորաձեւ է համարվում շատ փայլուն մաշկը, աչքերի շրջանում քարիկները, նեոնային գծաներկերը եւ վառ փայլուն շուրթերը»։
Ըստ Լուիզա Գրիգորյանի՝ մոդայից դուրս չեկող է համարվում դիմահարդարման մաքրությունը. «Կարող ես անել ամենավառ smokey eyes-ը, եւ եթե կա աշխատանքի մեջ մաքրություն, այն երբեք գռեհիկ չի դիտվի։ Կարեւոր է, որ տեսքդ լինի ընդհանուր մշակված՝ ամեն ինչ հստակ եւ կոկիկ»։
Զվարթ ՊԵՏՐՈՍՅԱՆ
«Առավոտ» օրաթերթ
27.11.2019
