Ամենայն հավանականությամբ հենց այսպես էլ կլինի, քանի որ այսօր ԱԺ տնտեսական հարցերի մշտական հանձնաժողովում, երկու ժամից ավել տևած քննարկումների ժամանակ, մերժվեց ներկայացված օրենսդրական նախագիծը:
Օրինագծով առաջարկվում էր հանրային գերակա շահ ճանաչված տարածքներն իրացնելիս բնակիչներին վճարել շուկայական արժեք + 25 % ավել փոխհատուցում, ներկայումս գործող 15 %-ի փոխարեն:
Նախագծով կկանոնակարգվեր կառուցապատող-բնակիչ իրավահարաբերությունները, որտեղ պետության կողմից համաչափության և արդարության դրսևորումներն առավել ընդգծված կլինեին:
Քանի որ 10 տարուց ավել է խորհրդարանում և ոչ միայն բարձրաձայնում եմ առկա խնդիրները, բնական է, որ լավ պատկերացնում եմ իրավական նման փոփոխության անհրաժեշտությունը:
Կարդացեք նաև
Նախագծի մասին հագեցած քննարկումներ եմ ունեցել ինչպես բնակիչների հետ, այնպես էլ կառուցապատող ընկերությունների հետ (այդ թվում արտերկրի), և բոլոր կողմերի համար 25% ֆիքսելն ընկալելի շեմ է:
Ցավոք, հանձնաժողովն այսօր առանց խորքային ու առարկայական ուսումնասիրության, բացասական եզրակացություն տվեց նախագծին:
Եվ չնայած, որ ԱԺ Կանոնակարգ սահմանադրական օրենքի համաձայն խորհրդարանական հաջորդ չորսօրյա նիստերին 3 րոպեի սահմաններում հնարավորություն կունենամ կրկին նախագիծը ներկայացնելու, այնուամենայնիվ լիահույս չեմ, թե հանրային գերակա շահ ճանաչված գոտիների բնակիչների համար այսքան կարևոր նշանակություն ունեցող օրինագիծը կընդունվի:
Խնդրին անդրադառնում եմ 10 տարուց ավել:
Խորհրդարանական լսումների գաղափարը, որն իրականացվեց ս/թ հոկտեմբերի 7-ին, դեռևս նախաձեռնվել էր ամռանն ընդառաջ իմ և իմ քաղաքական թիմի կողմից, սակայն քաղաքական մեծամասնության ներկայացուցիչներն ու ոլորտի առանցքային որոշ պատասխանատուների չներկայանալու հիմքով, ստիպված լսումները հետաձգեցինք, սակայն հետագայում իրականացվեց հոկտեմբերյան հայտնի լսումները: Google որոնողական համակարգով ժամանակագրությանն առնչվող բոլոր փաստերն առկա են, թե ով և ինչպես է նախաձեռնել քննարկումներն ու որ տարածքների բնակիչների խնդիրներին էր այն վերաբերելու:
Թե որքանով էր արդյունավետ համարվում հոկտեմբերի 7-ի լսումները և ի վերջո ինչ տվեց կողմերին, թող փաստեն ներկաներն ու տարածքների բնակիչները:
Վստահ եմ, որ այսօրվա նախաձեռնությունը կարող էր ևս մեկ քայլ դառնար իրավական դաշտն ավելի բարենպաստ դարձնելու, քաղաքաշինական ծրագրերին նոր թափ հաղորդելու և իհարկե վերոնշյալ տարածքների բնակիչների կենցաղային, իսկ որոշ դեպքերում նաև անմարդկային գոյատևման պայմանները բարելավելու համար:
Վերահաստատում եմ, որ Տերյան, Լալայանց, Պուշկին, Բելյակով, Բուզանդ, Արամի փողոցներ, Պռոշյանի 1-ին նրբանցք, Սարի Թաղ, Ֆիրդուսի 33-րդ, Կոնդ, Եկմալյան, Նորագյուղ թաղամասերի, իրացված և հանրային գերակա շահ ճանաչված այլ տարածքների խնդիրներին շարունակելու եմ լինել հետևողական:
Վահե ԷՆՖԻԱՋՅԱՆ
ՀՀ ԱԺ փոխնախագահ
