ՀՀ-ի եւu ԵՄ-ի միջեւ կնքված Համապարփակ եւ ընդլայնված գործընկերության համաձայնագրի 2-րդ տարեդարձի կապակցությամբ այսօր հրավիրված մամուլի ասուլիսին ԱԳ նախարարի տեղակալ Ավետ Ադոնցն ասաց, որ չնայած հույս ունեին համաձայնագրի վավերացումն ավելի շուտ կավարտվեր, բայց մնաց մյուս տարի. «Ուղղակի պետք է նշեմ, որ ՍԵՊԱ-ի 80%-ն իրականացման գործընթացում է գտնվում, եւ այդ 80%-ի համար ունենք գործողությունների ծրագիր, որը որ իրականացման գործընթացում է գտնվում։ Հասցեագրված ձեւով ենք այն իրականացնում: Դեկտեմբերի 16-ին Գործընկերության կոմիտեի նիստի ժամանակ տեղի կունենա իրականացման առաջին գնահատման գործընթացը»:
Վիզաների ազատականացման մասին հարցին ի պատասխան էլ Ադոնցն ասաց՝ այդ ուղղությամբ գործնական աշխատանքները կսկսվեն այն օրվանից, երբ կսկսվի երկխոսությունը, այսինքն՝ վիզաների ազատականացման բանակցությունները.« ՀՀ կառավարությունը միակողմանի իրականացնում է մի նախաձեռնություն, որի նպատակն է երկկողմ մակարդակներով եւ այցելելով ԵՄ տարբեր երկրների մայրաքաղաքներ, փորձում ենք հասկանալ՝ եթե այդ երկրներում կան խնդիրներ վիզաների ազատականացման հարցում, հասկանալ այդ խնդիրները եւ համատեղ փորձել գտնել այն անհրաժեշտ մեխանիզմներն ու գործիքները, որոնք կկարգավորեն եղած խնդիրները։ Մենք շատ բարձր ենք գնահատում ԵՄ դրական դիրքորոշումը վիզաների ազատականացման երկխոսությունը սկսելու առումով։
Պետք է հասկանանք, որ ԵՄ-ն դրա անդամ երկրների կողմից ղեկավարվող կազմակերպություն է, նմանատիպ որոշումները ԵՄ-ն կայացնում է, երբ կա կոնսենսուս անդամ երկրների կողմից եւ մենք անհամբեր սպասում ենք այդ կոնսենսուսին: Հուսով ենք, որ այդ կոնսենսուսն, այնուամենայնիվ, տեղի կունենա շատ շուտ։ Այսօրվա դրությամբ այն օրակարգը, որը ձեւավորված է ԵՄ-ի հետ, այն իմպլեմենտացիոն աշխատանքները, որ տեղի են ունենում այսօր թե՛ ՀՀ կողմից, թե՛ համատեղ աշխատանքների արդյունքում, թելադրում են ունենալ ավելի լիբերալ ռեժիմ, քան ունենք այսօր: Իսկ այսօր ունենք վիզաների դյուրացված ռեժիմ, որը անկեղծ ասած, պարզ մարդկային լեզվով ասած, չի բավարարում մեր քաղաքացիներին»։
Կարդացեք նաև
Մանրամասները՝ տեսանյութում:
Նելլի ԲԱԲԱՅԱՆ
