Այսօր Երեւանի քաղաքապետարանում լրագրողների հետ զրույցում Երեւանի քաղաքապետ Հայկ Մարությանը հայտնեց, որ 2020 թվականին 400-500 միկրոավտոբուս դուրս կգա հանրային տրանսպորտի հաշվեկշռից։
Քաղաքապետի խոսքով, միկրոավտոբուսների շահագործման ժամկետը հանրային տրանսպորտի հաշվեկշռում օրենքով կազմում է ոչ ավելի, քան 15 տարի, եւ հենց եկող տարի լրանում է միկրոավտոբուսների այդ ժամկետը:
Մարությանն ասաց, որ մասնավոր ընկերությունները չեն ցանկանում այդ ոլորտում ներդրումներ անել, քանի որ այս պայմաններում համարում են ոչ շահավետ: Քաղաքապետի տվյալներով, այսօր գրանցված է ավելի քան 1330 միկրոավտոբուս, եւ դրանցից 900-950-ն են ամեն օր սպասարկում քաղաքացիներին։
Մարությանը հայտնեց, որ եկող տարի ավտոբուսների որոշակի խմբաքանակ արդեն պետք է գա Երեւան, որպեսզի սկսվի փոխարինման գործընթացը. «Այն, թե որքան ավտոբուս կգա Երեւան եւ ինչ գումարի, կորոշվի մրցույթի արդյունքներով։ Ցանկացած պարագայում, մենք աշխատում ենք խնդրի համակարգային լուծման ուղղությամբ, որին կարելի կլինի հասնել 2-4 տարվա ընթացքում»։
Կարդացեք նաև
Քաղաքապետը հիշեցրեց, որ այս պահին էլ ընթանում է 20 վերելակների փոխելու գործընթացը։
Լուսինե ԲՈՒԴԱՂՅԱՆ
