«Նոր Հայաստանն առանց հին իրավական համակարգի»,- այս խորագրով նախաձեռնությամբ «Ռեստարտ» նախաձեռնության անդամներն այժմ ՀՀ ոստիկանության շենքի դիմաց են:
Այս պահին նրանք սպասում են, որ ՀՀ ոստիկանության պետի ժամանակավոր պաշտոնակատար Արման Սարգսյանը վերադառնա Ազգային ժողովից, և նրանք կարողանան հանդիպել ոստիկանության գնդապետի հետ:
Հիշեցնենք՝ երեկ՝ նոյեմբերի 25-ին նախաձեռնության անդամները ՀՀ ԱԱԾ-ի շենքի դիմաց էին: Նրանք վստահեցնում են, որ հեղափոխությունը դեռ չի հասել իրավապահ մարմիններ:
«Ռեստարտ» նախաձեռնության անդամ Դավիթ Պետրոսյանը լրագրողների հետ զրույցում ասաց, որ հանդիպելու են տարբեր պետական մարմինների հետ. մի քանի բացահայտումներ են անելու: Այնուհետև հավելեց. «Մենք ոստիկանությունից մինչև դատական համակարգ բոլոր մարմինները նկատի ունենք: Նախատեսում ենք այց օրենսդիր մարմին և կառավարություն»:
Կարդացեք նաև
«Ռեստարտ» նախաձեռնության անդամ Յուրի Ավագյանն էլ ասաց, որ ցանկանում են հանդիպել ոստիկանության պետի ժամանակավոր պաշտոնակատարի հետ, որ հարցադրումներ կատարեն հետհեղափոխական ոստիկանության կեցվածքի, կատարած աշխատանքների և դեռևս սպասվող աշխատանքների վերաբերյալ: Մեր նպատակը երկխոսությունն է: Բայց հանդիպումը լինելու է բաց. դա միակ նախապայմանն է»:
Ռեստարտականներին մոտեցավ ոստիկանության մի գնդապետ և ասաց, որ ոստիկանապետն ունի ընդունելության օրեր, և այդ օրերին հանդիպեն նրա հետ: Սակայն նախաձեռնության անդամներն ասացին, որ իրենք ցանկանում են նրան հանդիպել այսօր: Գնդապետն ասաց, որ կփորձի ճշտել այսօր դա հնարավո՞ր է կազմակերպել, թե՞ ոչ: Սակայն քիչ անց տեղեկացրեց, որ ոստիկանության պետի ժամանակավոր պաշտոնակատարն այժմ ԱԺ-ում մասնակցում է Մարդու իրավունքների պաշտպանի ինստիտուտի 15-ամյակին նվիրված միջոցառմանը: Դավիթ Պետրոսյանն ասաց, որ իրենք կսպասեն նրա վերադարձին և հստակ պատասխանի:
Տաթև ՀԱՐՈՒԹՅՈՒՆՅԱՆ
Լուսանկարը՝ «Ա1+»-ի
