ՀՀ ԱԺ արտաքին հարաբերությունների մշտական հանձնաժողովը նոյեմբերի 25-ին հրավիրած նիստում Ռուբեն Ռուբինյանի նախագահությամբ քննարկել է «ՀՀ կառավարության եւ Չինաստանի Ժողովրդական Հանրապետության կառավարության միջեւ սովորական անձնագրեր կրող անձանց համար մուտքի արտոնագրի պահանջի փոխադարձաբար վերացման մասին» համաձայնագիրը վավերացնելու մասին» օրենքի նախագիծը:
ՀՀ ԱԳ նախարարի տեղակալ Ավետ Ադոնցը նշել է, որ վերջին տարիներին Չինաստանի հետ Հայաստանի հարաբերություններում զարգացման առաջընթաց է գրանցվել ինչպես քաղաքական, այնպես էլ տնտեսական ոլորտներում: Ըստ նրա՝ մուտքի արտոնագրերի ազատականացումը մեծ դեր կունենա երկու երկրների միջեւ առկա կապերն ավելի խորացնելու հարցում:
Համաձայնագրի վավերացման դեպքում թե՛ Հայաստանի եւ թե՛ Չինաստանի քաղաքացիներն ազատվում են մուտքի արտոնագրի պահանջից՝ մինչեւ 90 օր ժամկետով մուտքի դեպքում: Իսկ այն քաղաքացիները, ովքեր մտադիր են մուտք գործելու եւ գտնվելու մյուս կողմի պետության տարածքում 90 օրը գերազանցող ժամկետով՝ ցանկացած 180 օր ժամանակահատվածի ընթացքում կամ աշխատելու, սովորելու, բնակվելու, զբաղվելու լրագրությամբ կամ այլ գործունեությամբ պետք է դիմեն նախապես՝ մուտքի արտոնագիր ստանալու համար:
Պետությունները նաեւ պարտավորվում են արագ եւ արդյունավետ միջոցներ ձեռնարկել «առանց վիզայի ռեժիմը» չարաշահող քաղաքացիներին իրենց երկիր վերադարձնելու համար:
Կարդացեք նաև
Փոխնախարարը նշել է, որ 2019թ. հունվար-հոկտեմբեր ամիսների ընթացքում մեր երկիր է այցելել շուրջ 14.500 Չինաստանի քաղաքացի: Նա նաեւ տեղեկացրել է, որ համաձայնագրի դրույթները չեն տարածվում Հոնկոնգ եւ Մակաո այցելող Հայաստանի քաղաքացիների վրա:
Հարակից զեկուցող ՀՀ ԱԺ «Իմ քայլը» խմբակցության պատգամավոր Գոռ Գեւորգյանի խոսքով՝ ՀՀ արտաքին գործերի, ֆինանսների, արդարադատության նախարարությունները եւ Պետական գույքի կառավարման կոմիտեն նպատակահարմար են համարում համաձայնագրի վավերացումը՝ փաստելով, որ այն չի առաջացնի պետական բյուջեի ծախսերի, օրենքի փոփոխություններ: Համաձայնագրի դրույթները չեն հակասում ՀՀ գործող օրենքներին:
Նիստին ներկա պատգամավորները կարեւորել են փաստաթղթի վավերացումը՝ նշելով, որ այն կնպաստի մի շարք ոլորտներում համագործակցության ակտիվացմանը:
Համաձայնագիրը դրական եզրակացությամբ առաջարկվել է ընդգրկել ԱԺ նստաշրջանի եւ հերթական նիստերի օրակարգերի նախագծերում:
Հանձնաժողովը քննարկել եւ դրական եզրակացություն է տվել ՀՀ Ազգային ժողովում Հայաստան-Սինգապուր բարեկամական խումբ ստեղծելու նախաձեռնությանը:
ՀՀ ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը նշել է, որ Սինգապուրի հետ միջխորհրդարանական կապերի զարգացումը կարեւորել են ՀՀ վարչապետ Նիկոլ Փաշինյանը՝ Սինգապուր կատարած իր այցի ընթացքում եւ ՀՀ ԱԺ նախագահ Արարատ Միրզոյանը՝ Սինգապուրի վարչապետ Լի Սյեն Լունի հետ հանդիպման ժամանակ:
«Սինգապուրի խորհրդարանում արդեն ձեւավորվել է Սինգապուր-Հայաստան բարեկամական խումբ»,-նշել է Ռուբեն Ռուբինյանը:
ՀՀ Ազգային ժողով
