Համացանցում հայտնված տեսանյութի կապակցությամբ, որում ոստիկանները խոշտանգումներով ցուցմունք են կորզում, ՀՔԾ-ում քրեական գործ է հարուցվել, բայց առայժմ մեղադրյալ չկա: Այս մասին Aravot.am-ին ասաց ՀՔԾ մամլո խոսնակ Մարինա Օհանջանյանը:
Տեսանյութի հրապարակումից մեկ օր անց ոստիկանությունից հայտնեցին՝ ծառայողական քննության շրջանակում ժամանակավորապես դադարեցվել են ոստիկանության Ճամբարակի բաժնի պետ Նարեկ Սիմոնյանի լիազորությունները։ Մեր տեղեկություններով՝ Նարեկ Սիմոնյանը Ճամբարակում պաշտոն էր ստացել այս տարվա օգոստոսի 22-ին, մինչ այդ ոստիկանության Սևանի բաժնի պետի օպերգծով տեղակալի պաշտոնն էր զբաղեցնում: Սեւանի քաղաքապետ Սարգիս Մուրադյանը մեզ հետ զրույցում ասաց, որ նա Սեւանում երկար չի աշխատել՝ ընդամենը մի քանի ամիս: Մեր տեղեկություններով՝ Սիմոնյանը Սեւան տեղափոխվել էր Արմավիրի բաժնի պետի օպերգծով տեղակալի պաշտոնից այս տարվա փետրվարին: Նա աշխատել է նաեւ Երեւանում:
Ոստիկանությունից մեզ չասացին, թե Երեւանում Նարեկ Սիմոնյանն ինչ պաշտոն է զբաղեցրել ու որ բաժնում է աշխատել, ասացին՝ կատարվածի մասին հրապարակման ենթակա տեղեկատվությունն արդեն հրապարակված է: Որոշ տեղեկությունների համաձայն՝ Նարեկ Սիմոնյանը Երեւանում աշխատելու տարիներին ծառայություն է իրականացրել Արաբկիրի բաժնում, որտեղ էլ, որ կատարվել է խոշտանգումը:
Այսօր իրավապաշտպան Նինա Կարապետյանցը լրագրողների հետ հանդիպման ժամանակ պատմել էր, որ իրենց հետ կապվել են տուժողի ազգականները: Մեզ հետ զրույցում տիկին Կարապետյանցն ասաց՝ ըստ տուժողի ազգականների՝ դեպքը տեղի է ունեցել 2008-ից հետո ու, ամենայն հավանականությամբ, խոշտանգման արդյունքում ձեռք բերված ցուցմունքը օգտագործվել է նշված անձի դեմ, որը հիմա դատապարտված է: Դեպքի մանրամասներ դատապարտվածի ազգականները տիկին Կարապետյանցին չեն հայտնել, միայն ասել են՝ պատրաստ են երկար պայքարի ու պատրաստվում են բողոքարկել դատավճիռը:
Կարդացեք նաև
Արփինե ՍԻՄՈՆՅԱՆ
