ԱԱԾ նախկին տնօրեն Արթուր Վանեցյանը իր վերջին հարցազրույցում ասում է, որ Սորոսի գրասենյակի գործունեությունը ՀՀ-ում վտանգ է պարունակում:
Այսօր «Իմ քայլը» խմբակցության ղեկավար Լիլիթ Մակունցին հարցրեցին, փորձե՞լ եք ճշտել, թե ի՞նչ վտանգների մասին էր ակնարկում Վանեցյանը: Նա պատասխանեց. «Այն մեկնաբանությունները, որոնք արվում են Բաց հասարակության հիմնադրամի առնչությամբ, եղել են դեռ վաղուց, այն ժամանակ, երբ պարոն Վանեցյանը ԱԱԾ տնօրեն էր: Գրեթե ամեն օր էին արվում այդ հայտարարությունները, եւ ես վստահ եմ, որ եթե պարոն Վանեցյանը որեւէ կերպ ազգային անվտանգությանը վտանգ ներկայացնող կազմակերպությանը առնչվեր, այդ թվում այն կազմակերպությանը, որի մասին հարց հնչեցրեցիք, ես վստահ եմ, որ նա կձեռնարկեր բոլոր անհրաժեշտ քայլերը, եւ եթե պարոն Վանեցյանը այդ գործողությունների չի դիմել, ուրեմն պետք է համոզված լինենք, որ որեւէ վտանգ նա չի տեսել»:
Մակունցը նաեւ ասաց. «Ինստիտուտները անձերով պայմանավորված չեն, պարոն Վանեցյանի այդ դիրքորոշումը, վստաh եմ, որ հիմնված է այն զեկույցների, վերլուծությունների վրա, որը նրան ներկայացվել է: Եվ այս պարագայում հիմա նրա հայտարարությունները, իհարկե, ինձ մոտ տարակուսանք առաջացնում են, եւ կարծում եմ, դրա պարզաբանումը պարոն Վանեցյանը ձեզ կտա, եթե նրան հարց ուղղեք»:
Հռիփսիմե ՋԵԲԵՋՅԱՆ
