Ըստ ՀՀ Անտառային օրենսգրքի 3-րդ հոդվածի, անտառը սահմանված է իբրեւ «անտառային կամ անտառապատման նպատակով հատկացված այլ հողերում ծառաթփային բուսականության գերակշռությամբ կենսաբանական բազմազանության ու բնական միջավայրի բաղադրիչների փոխադարձորեն կապված և միմյանց վրա փոխազդող ամբողջություն, որի նվազագույն մակերեսը կազմում է 0,1 հեկտար, նվազագույն լայնությունը` 10 մետր, և որտեղ ծառերի սաղարթը ծածկում է տվյալ տարածքի առնվազն 30 տոկոսը, ինչպես նաև նախկինում անտառածածկ անտառային հողերի ոչ անտառածածկ տարածքները»։
Բնապահպան, «Կանաչ Հայաստան» հասարակական կազմակերպության նախագահ Հայկ Գրիգորյանը մեր զրույցում ասաց, թե մեր երկիրը դանդաղ քայլում է դեպի անապատացում, իսկ դրա գլխավոր պատճառն օր-օրի շատացող անտառահատումներն են. «Ծառերը հատում են, ասֆալտ փռում, քաղաքի օդն են չորացնում… քաղաքի թոքերն են կտրում, բետոնից պուրակներ են սարքում, որոնք մեզ թթվածին չեն տալիս»,- հավելեց Հայկ Գրիգորյանը։
Բուսական աշխարհի պահպանության ոլորտում վերջին շրջանում արձանագրվել են հետևյալ իրավախախտումները.
- Լոռի՝ ապօրինի ծառահատման 3 դեպքով (1 թխկի, 1 քամատապալ բոխի, 2 քամատապալ կաղնի, 1 հողմատապալ հաճարենի) հաշվարկվել է 308.300 ՀՀ դրամի, փայտանյութի ապօրինի տեղափոխման 1 դեպքով (0,25 խմ թափուկ վառելափայտ)՝ 4.500 ՀՀ դրամի չափով շրջակա միջավայրին հասցված վնաս։
- Սյունիք՝ նախկինում արձանագրված ապօրինի ծառահատման 2 դեպքով հաշվարկվել է 357.000 ՀՀ դրամի չափով շրջակա միջավայրին հասցված վնաս և նշանակվել է 120.000 ՀՀ դրամի չափով վարչական տուգանք։
- Վայոց Ձոր՝ ապօրինի ծառահատման 2 դեպքով (14 ուռենի, 1 թթենի) հաշվարկվել է 436.000 ՀՀ դրամի չափով շրջակա միջավայրին հասցված վնաս։
(նյութը հղումը)
Հայաստանյան անտառների վերջին հաշվառումը իրականացվել է հեռավոր 1993 թվականին, ըստ որի, երկրի 11 տոկոսը անտառածածկ է. ՄԱԿ-ի «Կլիմայի փոփոխության մասին» կոնվենցիայով մեր երկիրը պարտավորվել է մինչև 2050 թվականը Հայաստանի անտառածածկ տարածքները հասցնել 21 տոկոսի։
Կարդացեք նաև
Այս տարի հակաբնապահպանական ամենաաղմկահարույց դեպքը գրանցվեց Իջևանում. տեղի բնակիչները բողոքի ցույց էին նախաձեռնել ապօրինի անտառահատումների արգելքի դեմ: Բախում տեղի ունեցավ ոստիկանների և քաղաքացիների միջև, իրավապահների նկատմամբ կիրառված բռնության համար մեղադրանք առաջադրվեց 13 անձի։
Իջևանի անտառտնտեսության անտառապետ Վարդան Առուստամյանը լրագրողների հետ զրույցում ասել էր, որ հուլիս ամսվա ընթացքում 70-80 խորանարդ մետր փայտ է առգրավվել։ Ընդհանուր առմամբ Տավուշի մարզում այս տարվա առաջին կիսամյակում ապօրինի ծառահատման 73 քրեական գործ է հարուցվել։ Վեց ամսվա ընթացքում բնությանը պատճառված վնասի չափը ապօրինի ծառահատումների դեպքերով կազմում է շուրջ 395 միլիոն 643 հազար 850 դրամ։ Եվս 14 գործ էլ հարուցվել է պաշտոնական լիազորությունների չարաշահման, անփութության ու կաշառք ստանալու հատկանիշներով։
Նշենք, որ անտառային և հատումներն արգելող տարածքները և բուսածածկը ոչնչացնելու համար քրեական օրենսգրքով նախատեսված են պատիժներ, մասնավորապես՝ մինչև 4 մլն դրամ տուգանք, նաև 3-8 տարի ժամկետով ազատազրկում:
Բնապահպանի համոզմամբ, մարդուն դեռ փոքր հասակից հարկավոր է սովորեցնել սիրել ու պահպանել բնությունը։ Երեխան դպրոցում դասագրքային ուսումից պետք է անցնի գործնականի՝ ծառ տնկի, ջրի, էտի, սովորի անհրաժեշտ խնամք ցուցաբերել բույսերին և կենդանիներին։
Բնապահպանական կրթության հարցում հ/կ-ի ղեկավարը կարևորեց նաև ընտանիքի դերը. «Շատ եմ տեսել, երբ իբրև երեխային պաշտպանելու համար հենց նրա աչքի առաջ մայրը տրորել է փոքրիկ բլոճի՝ ակամայից վատ օրինակ ծառայելով իր երեխային։ Փոխանակ գետնից վերցնի ու ցույց տա, որ անվնաս արարած է, և, որ դրանց պետք է պաշտպանել, ոչ թե սատկացնել»։
Մարիամ ԱՎԱՆԵՍՅԱՆ
Լոռվա և Տավուշի մարզերի անտառների լուսանկարները տրամադրել է բնապահպան Հայկ Գրիգորյանը:
